Gulte Telugu Telugu Political and Movie News Updates
మెగా ఫ్యామిలీ నుంచి కొత్తగా ఇండస్ట్రీలోకి అడుగు పెడుతున్న హీరో వైష్ణవ్ తేజ్. మెగాస్టార్ చిరంజీవికి చిన్న మేనల్లుడు, సాయిధరమ్‌ తేజ్‌కు తమ్ముడు అయిన వైష్ణవ్.. మిగతా కుర్రాళ్లలా అరంగేట్ర సినిమాకు యాక్షన్ బాట పట్టలేదు. హీరోయిజం, ఎలివేషన్ల గురించి పెద్దగా ఆలోచించలేదు. ఒక మంచి ప్రేమకథలో, డీగ్లామరస్ రోల్‌లో నటించే సాహసానికి పూనుకున్నాడు. అది మంచి ఫలితమే అందించేలా కనిపిస్తోంది.
‘ఉప్పెన’ టీజర్, ట్రైలర్, ఇతర ప్రోమోలు చూస్తే పెర్ఫామెన్స్ పరంగా వైష్ణవ్‌కు మంచి స్కోపే లభించినట్లు కనిపిస్తోంది. మొన్న ప్రి రిలీజ్ ఈవెంట్లో చిరు, సుక్కు, విజయ్ సేతుపతి తదితరులు వైష్ణవ్ పెర్ఫామెన్స్ గురించి, కళ్లతో అతను పలికించిన భావాల గురించి గొప్పగానే మాట్లాడారు. ఇక సినిమా మొత్తం చూసిన మెగాస్టార్ చిరంజీవి.. తనకు పెద్ద కాంప్లిమెంటే ఇచ్చినట్లు వైష్ణవ్ తాజాగా వెల్లడించాడు.
‘ఉప్పెన’ ప్రమోషన్లలో భాగంగా మీడియాను కలిసిన అతను.. సినిమా చూశాక చిరు స్పందన గురించి గుర్తు చేసుకున్నాడు. సినిమా చూశాక తన మావయ్య ఏమంటాడా అని ఉత్కంఠగా ఎదురు చూశానని.. ‘‘సూపర్‌‌గా చేశావ్‌ రా. నా పరువు నిలబెట్టావ్ రా’’ అని ఆయన కాంప్లిమెంట్ ఇచ్చాడని వైష్ణవ్ వెల్లడించాడు. తన జీవితంలో ఇదే అది పెద్ద కాంప్లిమెంట్‌గా భావిస్తానని వైష్ణవ్ తెలిపాడు. చిరుకు సినిమా ఎంతగానో నచ్చిందని, ప్రేక్షకులకు కూడా అలాగే నచ్చుతుందని ఆశిస్తున్నట్లు అతను చెప్పాడు. తన చిన్న మావయ్య పవన్ కళ్యాణ్ ‘ఉప్పెన’ ట్రైలర్ మాత్రమే చూశారని, సినిమా చూడలేదని.. ట్రైలర్ చాలా బాగుందని, అందులో డైలాగులు భలే ఉన్నాయని కితాబిచ్చాడని వైష్ణవ్ వెల్లడించాడు.
‘ఉప్పెన’ విషయంలో జూనియర్ ఎన్టీఆర్ ఇచ్చిన సహకారం కూడా మరిచిపోలేనిదని.. రామ్ చరణ్ ఇంట్లో ఆయన్ని కలిశానని, అప్పట్నుంచి తనను సొంత సోదరుడి లాగా చూశాడని, తరచుగా ఫోన్ చేసి సినిమా ఎలా వస్తోందో అడిగి, విలువైన సలహాలు ఇచ్చాడని, ‘ఉప్పెన’ ట్రైలర్ కూడా లాంచ్ చేసి తనకు సపోర్ట్ చేశాడని వైష్ణవ్ తెలిపాడు. మంచు మనోజ్ సైతం తనకు అండగా నిలిచాడని, ఆయనకు రుణపడి ఉంటానని వైష్ణవ్ చెప్పాడు.
