నష్టాలు వచ్చాయని ఒప్పుకున్న నాని

తమ సినిమాలు థియేటర్లలో ఉండగా అందులో లోపాల గురించి.. దాని మీద వచ్చే విమర్శల గురించి, కలెక్షన్లు తక్కువ రావడం గురించి హీరోలు మాట్లాడడానికి ఇష్టపడరు. కానీ నేచురల్ స్టార్ నాని మాత్రం అందుకు భిన్నం. ‘ది ప్యారడైజ్’ రిలీజైన తర్వాతి రోజే.. ఈ సినిమా మీద వస్తున్న ట్రోల్స్, విమర్శల గురించి ఎక్స్‌లో పెట్టిన పోస్టులో ప్రస్తావించాడు. అంతే కాక దర్శకుడు శ్రీకాంత్ ఓదెలతో కలిసి జరిపిన చిట్ ‌చాట్‌లో సినిమాలో లోపాల గురించి ఓపెన్‌గా డిస్కస్ చేశాడు.

ఇప్పుడు హాలీవుడ్ రిపోర్టర్ మ్యాగజైన్‌ కోసం అనుపమ చోప్రాతో చేసిన ఇంటర్వ్యూలో నాని.. ‘ది ప్యారడైజ్’ నష్టాల గురించి కూడా ఓపెన్‌గా మాట్లాడాడు. ఈ సినిమా ఫలితంతో నిర్మాత సంతోషంగానే ఉన్నట్లు చెప్పిన నాని.. కొన్ని ఏరియాల్లో బయ్యర్లు నష్టపోయిన మాట వాస్తవమని అంగీకరించాడు.

కానీ తొలి రోజు వచ్చిన టాక్‌ను బట్టి తాము అంచనా వేసిన దాంతో పోలిస్తే సినిమా చాలా ఎక్కువ వసూళ్లే రాబట్టిందని నాని అన్నాడు. కొన్ని చోట్ల సినిమా అంచనాలను మించి పెర్ఫామ్ చేసిందని, కొందరు మాత్రం నష్టపోయారని గుర్తించామని అతనన్నాడు.

మరోవైపు సుజీత్ దర్శకత్వంలో తాను చేయబోయే ‘బ్లడీ రోమియో’లో ఎక్కువ వయొలెన్స్ ఉండదని, ఉన్నా కూడా అది స్టైలిష్‌గా ఉంటుందని చెప్పిన నాని.. ఇలాంటి జానర్ తెలుగులో రానే లేదని చెప్పడం విశేషం. తన క్యారెక్టర్ ఇందులో చమత్కారంగా ఉంటుందని, వయొలెన్స్‌లో ఒక ట్విస్టు కూడా ఉంటుందని నాని తెలిపాడు.

మరోవైపు ‘బ్లడీ రోమియో’ తర్వాత చేయబోయే సినిమా గురించి కూడా ఆసక్తికర కబురు చెప్పాడు నాని. అదొక అందమైన, సటిల్ లవ్ స్టోరీ అన్న నాని.. ఆ సినిమా అందరూ చూడదగ్గదిగా ఉంటుందంటూ ప్రేక్షకులకు అభయం ఇచ్చాడు. నితిన్ హీరోగా తాను ప్రొడ్యూస్ చేస్తున్న ‘అలియాస్ రుక్మిణి’ బ్యూటిఫుల్ మూవీ అని.. ఇప్పటిదాకా దాని రష్ చూస్తే చాలా ఎగ్జైట్మెంట్ కలిగిందని నాని అన్నాడు.