గణేష్ నిమజ్జనంలో ఆరుగురు విద్యార్థులు మృతి

ఉత్సాహంగా పండుగ చేసుకుంటున్న సమయంలో ఒకే గ్రామానికి చెందిన ఆరుగురు విద్యార్థులు మరణించడంతో తెలంగాణాలో విషాదం నెలకొంది. మృతి చెందిన వారంతా 20 సంవత్సరాల లోపు యువకులు కావడంతో గమనార్హం. దీంతో చేతికి అందివస్తారనుకున్న పిల్లలు కళ్ళ ముందే చనిపోవడంతో ఆ కుటుంబాలు విషాదంలో మునిగిపోయాయి. ఘటన సమాచారం తెలిసిన వెంటనే ప్రభుత్వం అప్రమత్తం అయింది. తెలంగాణా వ్యాప్తంగా చెరువులు, కుంటల వద్ద ముందస్తు జాగ్రత్త చర్యలు తీసుకోవాలని అధికారులను ఆదేశించింది.

తెలంగాణాలోని సంగారెడ్డి జిల్లా పటాన్‌ చెరు పోలీస్ స్టేషన్ పరిధిలోని పెద్దకంజర్ల గ్రామానికి చెందిన బీటెక్ చదువుతున్న నరసింహ రాజు ,డిప్లమా చదువుకుంటున్న సుమంత్, గణేష్,ఉదయ్ కిరణ్,శ్యామ్ కుమార్ లతో పాటుగా 10 వ తరగతి చదువుతున్న 15 ఏళ్ళ బాలుడు సిద్ధార్థ్ గణేష్ గ్రామంలో జరుగుతున్న నిమజ్జనంలో పాల్గొన్నారు. అప్పటి వరకు హుషారుగా ఆడుతూ పాడారు. గ్రామ శివారులోని నేరేడు చెరువులో విగ్రహాన్ని నిమజ్జనం చేస్తుండగా ప్రమాదవశాత్తు జారి పడిపోయారు.

కళ్ళు మూసి తెరిచే లోపలే విగత జీవులుగా మారారు. వినాయక చవితి పండుగ సందర్బంగా మూడు రోజులుగా గ్రామంలో జరుగుతున్న వేడుకలు విషాదంగా ముగిశాయి. స్థానికంగా వున్న శిరీషా చారిటబుల్ ట్రస్టులో క్రియశీలకంగా పనిచేస్తూ గ్రామంలో తలలో నాలుకలా వుండే యువకులు చనిపోవడంతో గ్రామస్తులు కన్నీరు మున్నీరవుతున్నారు. వారి తలిదండ్రులను ఓదార్చడం ఎవరితరం కావట్లేదు.

ఈ దుర్ఘటన సమాచారం తెలిసిన వెంటనే ముఖ్యమంత్రి రేవంత్ రెడ్డి తీవ్రంగా స్పందించారు. ఈ దుర్ఘటనపై తీవ్ర దిగ్భ్రాంతి వ్యక్తం చేశారు. సంగారెడ్డి జిల్లా పటాన్‌ చెరు, పెద్దకంజర్ల గ్రామంలో వినాయక నిమజ్జనానికి వెళ్లిన ఆరుగురు విద్యార్థులు మృతి చెందడం విషాదకరం, ఈ దుర్ఘటన పట్ల తీవ్ర దిగ్భ్రాంతి వ్యక్తం చేస్తున్నాను .పండుగ సమయంలో జరిగిన ఈ విషాదం తనను ఎంతగానో కలిచి వేసిందని, మృతుల కుటుంబాలకు ప్రగాఢ సానుభూతి తెలుపుతున్నానని ప్రభుత్వ అధికారిక ఖాతాలో ట్విట్ చేశారు. బాధిత కుటుంబాలను ఆదుకోవాలని జిల్లా యంత్రాంగాన్ని ముఖ్యమంత్రి రేవంత్ రెడ్డి అధికారులను ఆదేశించారు. తెలంగాణాలోని అన్నీ గ్రామాలు, పట్టణాల్లో గణేష్ నిమజ్జనం సందర్భంగా తగిన జాగ్రత్తలు తీసుకోవాలని అధికారులకు సూచించారు.