‘మస్క్ జీవితంలో ఇదే అతిపెద్ద తప్పు’

అమెరికాలో రాజకీయాలు మరోసారి వేడెక్కుతున్నాయి. ప్రముఖ వ్యాపారవేత్త ఎలాన్ మస్క్ ఇటీవల ‘అమెరికా పార్టీ’ అనే పేరుతో కొత్త రాజకీయ పార్టీని స్థాపించనున్నట్లు ప్రకటించడంతో, మాజీ అధ్యక్షుడు డొనాల్డ్ ట్రంప్ ఘాటుగా స్పందించారు. మూడో పార్టీ ఏర్పాటు అమెరికాలో అసాధ్యం అని ట్రంప్ తేల్చి చెప్పారు. ఇది మస్క్ జీవితంలో తీసుకున్న అతిపెద్ద తప్పుడు నిర్ణయమని, ఆయన నియంత్రణ కోల్పోయారనే అభిప్రాయం వ్యక్తం చేశారు.

ట్రంప్ ఈ విషయాన్ని తన ట్రూత్ సోషల్ ఖాతాలో పేర్కొంటూ.. అమెరికాలో రెండు పార్టీల వ్యవస్థే విజయవంతంగా నడుస్తోందని అన్నారు. మూడో పార్టీలు గతంలో ఎన్నో ప్రయత్నాలు చేసినా చరిత్రలో నిలబడలేకపోయాయని గుర్తుచేశారు. మస్క్ ఇప్పుడే ఓ కొత్త పార్టీని పెట్టాలనుకోవడం విచారకరమని, ఇది ఆయన అతి నిర్ణయానికి నిదర్శనమని వ్యాఖ్యానించారు.

అంతేకాదు, ఇటీవల దేశ చరిత్రలోనే పెద్ద బిల్లును పార్లమెంట్ ఆమోదించిన సందర్భాన్ని ట్రంప్ ప్రస్తావిస్తూ, మస్క్ మాత్రం దానికి వ్యతిరేకంగా మాట్లాడారని అన్నారు. ఆయన ఎలక్ట్రిక్ వాహనాల మార్కెట్‌ను జలపాతంగా మలచాలని చూస్తున్నారని విమర్శించారు. ప్రజలపై అనవసరంగా తన ఆలోచనలను రుద్దేందుకు ప్రయత్నిస్తున్నారని పేర్కొన్నారు. ప్రజలకు ఏ వాహనం కావాలో వాళ్లే నిర్ణయించుకునే స్వేచ్ఛ ఉండాలనేది తన అభిప్రాయమని స్పష్టం చేశారు.

ఇదిలా ఉండగా, మస్క్ ప్రకటించిన ఈ కొత్త పార్టీ ప్రస్తుతం అమెరికాలో ప్రజాస్వామ్యం లేదనే భావనతో ముందుకు వస్తోందని తెలుస్తోంది. ప్రజలకు నిజమైన స్వేచ్ఛ ఇవ్వాలనే లక్ష్యంతోనే ఈ నిర్ణయం తీసుకున్నట్టు మస్క్ ట్వీట్ చేశారు. అయితే ఇప్పటి వరకు పార్టీ పేరును అధికారికంగా నమోదు చేయలేదు. మస్క్ పార్టీ ప్రాథమికంగా అమెరికా కాంగ్రెస్‌లోని కొద్దిపాటి స్థానాలపైనా, ముఖ్యంగా కొన్ని సెనెట్ సీట్లు, ప్రతినిధుల సభ స్థానాలపైనా దృష్టి పెట్టినట్టు సమాచారం.

అమెరికా రాజ్యాంగం ప్రకారం, అధ్యక్ష పదవికి అర్హత ఉండాలంటే అమెరికాలోనే జన్మించాలి. మస్క్ దక్షిణాఫ్రికాలో జన్మించిన వ్యక్తి కావడంతో అధ్యక్ష పదవిపై ఆశలు పెట్టుకోవడం కుదరదు. కానీ రాజకీయంగా ప్రభావం చూపే స్థాయికి చేరుకోవాలనే ప్రయత్నంలో భాగంగానే మూడో పార్టీ ఆలోచన తీసుకువచ్చారని భావిస్తున్నారు. గతంలో హాలీవుడ్ నటుడు ఆర్నాల్డ్ స్క్వార్జ్‌నెగ్గర్‌ కూడా అధ్యక్షుడిగా కాక గవర్నర్‌ స్థాయిలోనే ఆగిపోయారు.

ఇకపోతే, అమెరికాలో మూడో పార్టీలు స్థిరంగా నిలబడలేకపోయిన ఉదాహరణలు ఎన్నో ఉన్నాయి. గతంలో పలు వ్యక్తులు రాజకీయ ప్రత్యామ్నాయాన్ని తేవాలని ప్రయత్నించినా, ప్రధాన పార్టీల ధృఢతను ఎదుర్కొలేకపోయారు. మస్క్ ఈ ట్రెండ్‌ను తిరగరాయగలరా, లేక ట్రంప్ మాటలు నిజమవుతాయా అనే దానిపై రాజకీయ విశ్లేషకులలో ఆసక్తికరమైన చర్చ మొదలైంది.