వైర‌ల్ వీడియో.. కుక్క పిల్లతో శాడిస్టు ఆట‌

మ‌న‌కు చిన్న దెబ్బ త‌గిలితే విల‌విల‌లాడిపోతాం. బాధను మాట‌ల రూపంలో వ్య‌క్తం చేస్తాం. మ‌న‌ల్ని ఎవ‌రైనా గాయ‌ప‌రిస్తే వాళ్ల‌ను అంత తేలిగ్గా వ‌దిలిపెట్టం. మ‌రి నోరు లేని మూగ‌జీవాల‌ను దెబ్బ తీస్తే వాటి బాధ‌ను అవి ఎలా చెప్పుకోవాలి. ఈ మాత్రం ఇంగిత జ్ఞానం లేకుండా కొంద‌రు వాటి మీద ప్ర‌తాపం చూపించేస్తుంటారు.

https://twitter.com/SENTHILSSK1982/status/1350377313989345286

మూగ‌జీవాల‌ను హింసించ‌డంలో శాడిస్టిక్ ఆనందం పొందుతుంటారు. కేవ‌లం హింసించ‌డ‌మే కాదు.. వాటిని వీడియోలు తీసి సోష‌ల్ మీడియాలో పోస్ట్ చేసి పాపుల‌ర్ అవుదామ‌ని చూసేవాళ్లు కూడా ఉంటారు. అలాంటి శాడిస్టు కుర్రాళ్ల వీడియో ఒక‌టి సోష‌ల్ మీడియాలో ఇప్పుడు వైర‌ల్ అవుతోంది.

ఒక కుక్క పిల్ల కాలు ప‌ట్టుకుని గాల్లో గిర‌గిరా తిప్పి విసిరి కొట్టి వినోదం పొందుతున్న శాడిస్టుల వీడియో అది. ఒకరికి ఇద్ద‌రు ఇలా దిగ్భ్రాంతిక‌ర రీతిలో కుక్క పిల్ల‌ను హింసించారు. దాన్ని బాగా ఎంజాయ్ చేస్తూ వీడియో కూడా తీసుకున్నారు. అది సోష‌ల్ మీడియాలోకి వ‌చ్చింది. చూసిన వాళ్లంద‌రికీ గుండె త‌ర‌క్కుపోయేలా ఉన్న వీడియోను ల‌క్ష‌లాది మంది సోష‌ల్ మీడియాలో షేర్ చేస్తున్నారు.
ఈ ఘ‌ట‌న జ‌రిగింది ఆంధ్ర‌ప్ర‌దేశ్‌లోని విజ‌య‌వాడ‌లో అంటున్నారు.

లొకేష‌న్ గుర్తు ప‌ట్టి ఇలా చేసింది ఎవ‌రో తెలుసుకుని వారికి శిక్ష ప‌డేలా చూడాల‌ని.. ఇలాంటి వారికి బుద్ధి చెప్ప‌క‌పోతే ఈ త‌ర‌హా ఉదంతాలు కొన‌సాగుతాయ‌ని నెటిజ‌న్లు అంటున్నారు. ఆ మ‌ధ్య చెన్నైలో ఒక వ్య‌క్తి.. కోతిని మేడ మీది నుంచి విసిరేస్తూ వినోదం చూసిన వీడియో సైతం ఇలాగే వైర‌ల్ అయింది. ఆ వ్య‌క్తిని గుర్తించిన మూగ‌జీవాల సంర‌క్ష‌కులు గ‌ట్టి వార్నింగ్ ఇచ్చిన‌ట్లు తెలిసింది.