రోడ్డుపై పడుకొని ప్రియాంకా గాంధీ నిరసన

ఓటర్ల జాబితా సవరణ (ఎస్ఐఆర్) ప్రక్రియలో వివాదాల నేపథ్యంలో ఎన్నికల ప్రధాన కమిషనర్ జ్ఞానేశ్ కుమార్ రాజీనామా చేయాలని కాక్రోచ్ జనతా పార్టీ, ఇండీ కూటమి నిరనసలకు పిలుపునిచ్చిన సంగతి తెలిసిందే. ఈ క్రమంలోనే ఆ నిరసనలకు మద్దతుగా కాంగ్రెస్ అగ్రనేతలు రాహుల్ గాంధీ, ప్రియాంకా గాంధీలు నిన్న కేంద్ర ఎన్నికల సంఘం ప్రధాన కార్యాలయం దగ్గర నిరసన కార్యక్రమాల్లో పాల్గొన్నారు. ఈ క్రమంలోనే రాహుల్ గాంధీని పోలీసులు అదుపులోకి తీసుకొని రాత్రి 10 గంటల సమయంలో విడుదల చేశారు.

అయితే, ఈ రోజు కూడా రాహుల్ గాంధీని పోలీసులు అదుపులోకి తీసుకున్నారు. దీంతో, ప్రియాంకా గాంధీ, పలువురు మహిళా ఎంపీలు రోడ్డుపై పడుకొని నిరసన వ్యక్తం చేస్తున్నారు. రాహుల్ అరెస్టుతో కాంగ్రెస్ కార్యకర్తలు, పోలీసులకు మధ్య తీవ్ర వాగ్వాదం జరిగి తీవ్ర ఉద్రిక్త వాతావరణం ఏర్పడింది. జ్ఞానేశ్ కుమార్ రాజీనామా ప్రధాన డిమాండ్ గా నేడు జంతర్ మంతర్ దగ్గర ఆందోళన చేపట్టాలని కాంగ్రెస్ నేతలు నిర్ణయయించారు. కేంద్ర ఎన్నికల సంఘానికి వ్యతిరేకంగా ఇండియా కూటమి ఎంపీలంతా ఆందోళన చేపట్టారు.

పార్లమెంట్ నుంచి కేంద్ర ఎన్నికల సంఘం కార్యాలయం వైపు పాదయాత్రగా వెళ్లాలని ఇండీ కూటమి ఎంపీలు నిర్ణయించారు. ఈ క్రమంలోనే జంతర్ మంతర్ కు వెళ్లకుండా కాంగ్రెస్ ఎంపీలను పోలీసులు అడ్డుకున్నారు. ఈ నేపథ్యంలోనే పోలీసులు రాహుల్ గాంధీతోపాటు, కాంగ్రెస్ ఎంపీలను అరెస్టు చేశారు. జ్ఞానేశ్ కుమార్ ను అరెస్టు చేయాలని, నిరసన వ్యక్తం చేస్తున్న తమను ఎందుకు అరెస్టు చేస్తారని పోలీసులను రాహుల్ గాంధీ ప్రశ్నించారు. దమ్ముంటే తనను అరెస్ట్ చేయాలని రోడ్డుపై నిలబడ్డారు. పోలీసులు బలవంతంగా రాహుల్ ను వ్యాన్ లోకి ఎక్కించే ప్రయత్నం చేయగా…రాహుల్ నిరాకరించారు. దీంతో, అతి కష్టం మీద రాహుల్, ఇతర ఎంపీలను అరెస్ట్ చేసి వ్యాన్ లో తరలించారు.

ఈ క్రమంలోనే పోలీసుల తీరును ప్రియాంకా గాంధీ తప్పుబట్టారు. ఎంపీలను కొడతారా? ఈడ్చి పడేస్తారా? వారితో ఈ విధంగా ప్రవర్తిస్తారా అంటూ ఫైర్ అయ్యారు. పోలీసుల తీరుకు నిరసనగా రోడ్డుపై పడుకొని నిరసన వ్యక్తం చేశారు. ఆ తర్వాత ప్రియాంకా గాంధీని, ఇతర మహిళా ఎంపీలను పోలీసులు బలవంతంగా అరెస్టు చేశారు.