Gulte Telugu Telugu Political and Movie News Updates
కెజిఎఫ్ రాకముందు ఆయన పేరు శాండల్ వుడ్ లో తప్ప మిగిలిన భాషల్లో ఎవరికీ తెలియదు. కానీ ఆ తర్వాత జరిగింది హిస్టరీ. బ్యాక్ గ్రౌండ్ స్కోర్, ఎమోషనల్ సాంగ్స్ తో రవి బస్రూర్ తనను తాను నిరూపించుకున్న వైనం దర్శకులు వెంటపడేలా చేసింది. ప్రభాస్ లాంటి ప్యాన్ ఇండియా స్టార్ తో అతి తక్కువ టైంలో సలార్ రూపంలో గొప్ప అవకాశం దక్కించుకోవడమంటే మాటలు కాదు. దానికి తగ్గట్టే తన మీద పెట్టుకున్న అంచనాలను నిలబెట్టుకుంటూ కాటేరమ్మ లాంటి ఎపిసోడ్స్ కి రవి ఇచ్చిన నేపధ్య సంగీతం దాని స్థాయిని పదింతలు పెంచింది. ఈ రెండూ ప్రశాంత్ నీల్ సినిమాలన్నది తెలిసిన విషయమే.
ఇక నాణేనికి మరోవైపుకు వద్దాం. పైన చెప్పిన వాటిని మినహాయిస్తే రవి బస్రూర్ ఇంకే ఇతర సినిమాల్లో అంత మేజిక్ చేయలేకపోయాడనేది మ్యూజిక్ లవర్స్ ని కలవరపరిచే వాస్తవం. తెలుగులో బీజీఎమ్ ఇచ్చిన మార్షల్, శాసనసభ లాంటివి కనీసం పేర్లు కూడా ఆడియన్స్ కి గుర్తు లేవు. గోపీచంద్ భీమాకు స్కోర్ ఇచ్చింది తనేనంటే చాలా మంది ఆశ్చర్యపోతారేమో. హిందీలో సల్మాన్ ఖాన్ పిలిచి మరీ కిసీకా భాయ్ కిసీకా జాన్ కోసం నేపధ్య సంగీతం అడిగితే అక్కడా నిరాశే. కబ్జా నుంచి మొన్నొచ్చిన మార్టిన్ దాకా ఇదే తంతు. డౌట్ ఏంటంటే అసలు డైరెక్టర్లే కెజిఎఫ్ లాంటి సంగీతం ఇమ్మని అడిగి సతాయిస్తున్నారాని.
అనిరుధ్ రవిచందర్ లాగా రవి బస్రూర్ తనదైన ఒక ముద్ర అన్ని భాషల్లో వేయగలగాలి. దర్శకులు ఏం అడుగుతున్నారనేది పక్కన పెడితే కెజిఎఫ్ తరహా సౌండింగ్ ని మళ్ళీ మళ్ళీ రిపీట్ చేయడం స్పష్టంగా కనిపిస్తున్న నేపథ్యంలో బస్రూర్ కంపోజింగ్ లో మార్పులు రావాల్సిన అవసరముందని ఫ్యాన్స్ భావిస్తున్నారు. తన చేతిలో జూనియర్ ఎన్టీఆర్ – ప్రశాంత్ నీల్ ప్రాజెక్టు ఉంది. సలార్ పార్ట్ 2 శౌర్యంగపర్వం వస్తుంది. వీటిని తీసేది నీలే అయినా అంచనాల బరువుని బాధ్యతగా మోయాల్సిన అవసరం రవి బస్రూర్ మీద ఉంది. సక్సెస్ మాత్రం మాట్లాడే ఇండస్ట్రీలో కేవలం లక్కు మీదే అఆధారపడలేంగా.
