వీరమల్లు వద్దంటే విశ్వంభర వస్తాడు

అధికారిక ప్రకటన లేదన్న మాటే కానీ గేమ్ ఛేంజర్ సంక్రాంతికి, విశ్వంభర వేసవికి వాయిదా పడినట్టేనని డిస్ట్రిబ్యూషన్ వర్గాల్లో గుసగుసలు వినిపిస్తున్నాయి. జనవరి దూరంలో ఉన్నా థియేటర్లను అగ్రిమెంట్ చేసుకునే వ్యవహారాలు రెండు మూడు నెలల ముందే మొదలవుతాయి. దిల్ రాజు తన సర్కిల్లో ఉన్న బయ్యర్లకు ఎస్విసి బ్యానర్ లో రూపొందుతున్న రామ్ చరణ్, వెంకటేష్ సినిమాలు పండక్కి వస్తాయని, ఆ మేరకు ఏర్పాట్లలో ఉండమని చూచాయగా చెప్పారట.

వీలైతే దసరాకు అనౌన్స్ మెంట్లు వస్తాయని లేదా ఒకటి రెండు వారాల్లో ఆ లాంఛనం ఎట్టి పరిస్థితుల్లో పూర్తి చేస్తామని అన్నట్టు వినికిడి. సరే గేమ్ ఛేంజర్ కు మంచి సీజన్ దొరికిందని ఫ్యాన్స్ సంబరపడ్డా అసలు ఛాలెంజ్ విశ్వంభరకు ఉంటుంది. ఎందుకంటే భారీ బడ్జెట్ తో రూపొందిన ఈ విజువల్ వండర్ కు వీలైనంత సోలో డేట్ కావాలి. మార్చి చివరి వారం దానికి అనుకూలంగా ఉంటుంది. అయితే హరిహర వీరమల్లు ఆల్రెడీ అఫీషియల్ గా డేట్ లాక్ చేసుకుని కొన్ని వారాల క్రితమే పోస్టర్ వదిలింది.

గతంలో విజయ్ దేవరకొండ 12 కూడా ఇదే తేదీని అధికారికంగా ప్రకటించుకుంది. పవన్ వస్తున్నాడు కాబట్టి VD12 వాయిదా వేస్తారు. మరి విశ్వంభర ఏం చేస్తాడన్నది అసలు ట్విస్టు. ఇక్కడో ప్రీ ప్లాన్ ఉన్నట్టు అంతర్గత సమాచారం. ఒకవేళ మళ్ళీ ఏదైనా కారణాల వల్ల హరిహర వీరమల్లు కనక వెనుకడుగు వేస్తే ఆ స్లాట్ ని వెంటనే విశ్వంభర లాక్ చేసుకుంటాడు. అంటే తమ్ముడు స్థానంలో అన్నయ్య అన్న మాట. కానీ నిర్మాత ఏఎం రత్నం ఆ అవకాశం ఇవ్వకపోవచ్చు.

ఇప్పటికే విపరీతమైన జాప్యం, వాయిదాలతో ఆర్థికంగానూ చాలా బరువును మోస్తున్నారు. ఇది అర్థం చేసుకునే పవన్ కళ్యాణ్ ఓజిని కాదని వీరమల్లుకి డేట్లు ఇచ్చారు. సో విశ్వంభర ఇంకో ఆప్షన్ చూసుకోవాల్సి రావొచ్చు. అదే జరిగిన పక్షం ఏప్రిల్ లేదా జూన్ ఈ రెండు నెలల్లో ఒక మంచి టైం సెట్ చేసుకోవాల్సి ఉంటుంది. నిర్మాతలు చెప్పేదాకా ఈ ఊహాగానాలు కొనసాగుతూనే ఉంటాయి.