హృతిక్ ఫైటర్ మీద టాప్ గన్ స్టాంపు

ఇవాళ విడుదలైన హృతిక్ రోషన్ ఫైటర్ టీజర్ కు మంచి స్పందనే కనిపిస్తోంది. స్పై డ్రామాలతో బోర్ కొట్టేసిన బాలీవుడ్ జనాలకు రిలీఫ్ ఇచ్చేలా ఈసారి దర్శకుడు సిద్దార్థ్ ఆనంద్ ఆకాశంలో జరిగే విమానాల యుద్ధం కాన్సెప్ట్ ని తీసుకున్నాడు. దానికి దేశభక్తి జోడించి, దీపికా పదుకునేతో హాట్ గ్లామర్ ప్లస్ స్కిన్ షో చేయించేశాడు. ఆన్ లైన్ లో యాక్షన్ విజువల్స్ కన్నా బీచ్ ఒడ్డున హీరో హీరోయిన్ల హాట్ ఫోజు వైరల్ గా మారుతోంది. భారీతనం ఉట్టిపడుతోంది కానీ హాలీవుడ్ క్లాసిక్ మూవీ టాప్ గన్ ఛాయలు స్పష్టంగా కనిపించడం చూస్తే స్ఫూర్తి చెందారేమోననే అనుమానం కలిగిస్తోంది.

ఇంత పెద్ద కాన్వాస్ తో ఫ్లైట్ బ్యాక్ డ్రాప్ లో గత కొన్నేళ్లలో స్టార్ హీరో సినిమా రాలేదు. అందులోనూ హృతిక్ రోషన్ చేస్తుండటంతో అంచనాలు మాములుగా లేవు. వరుణ్ తేజ్ ఇలాంటి కాన్సెప్ట్ తో సోని సంస్థ నిర్మాణంలో ఆపరేషన్ వాలెంటైన్ చేశాడు కానీ డిసెంబర్ 8 విడుదల కావలసిన ఈ ప్యాన్ ఇండియా మూవీ అనుకోకుండా వాయిదా పడింది. ఇందులో కూడా విజువల్స్ కట్టిపడేసేలా ఉంటాయని యూనిట్ అంటోంది కానీ కనీసం టీజర్ వస్తే కానీ క్లారిటీ రాదు. టాప్ గన్ తో పోలిక వరకు బాగానే ఉంది కానీ అంచనాలు అందుకోవడంలో ఏ మాత్రం తేడా వచ్చినా ఫైటర్ కు ఇబ్బందే.

2025 రిపబ్లిక్ డేని లక్ష్యంగా చేసుకుని వస్తున్న ఫైటర్ కు మోహన్ లాల్, విక్రమ్ లు పోటీ ఇచ్చేందుకు సిద్ధంగా ఉన్నారు. అయితే ప్యాన్ ఇండియా భాషల్లో రిలీజ్ చేస్తారో లేదో చెప్పలేదు. పఠాన్, జవాన్, టైగర్ 3 అన్ని ప్రాంతీయ భాషల్లో డబ్బింగ్ చేశారు. డంకీకి మాత్రం వద్దనుకున్నారు. యానిమల్ తో మంచి పాత్ర దక్కించుకున్న అనిల్ కపూర్ ఫైటర్ లోనూ కీలకంగా వ్యవహరించబోతున్నాడు. ప్రతి గణతంత్ర దినోత్సవానికి ఒక భారీ చిత్రాన్ని రిలీజ్ చేయడాన్ని సెంటిమెంట్ గా పెట్టుకున్న బాలీవుడ్ కి ఈసారి కాంపిటీషన్ కష్టంగానే ఉంది కానీ హృతిక్ ఏ మేజిక్ చేస్తాడో చూడాలి.