రానా పెళ్లిపై పంచులే పంచులు

Article by suman Published on: 9:10 pm, 8 August 2020

టాలీవుడ్లో చాలా ఏళ్లుగా మోస్ట్ ఎలిజిబుల్ బ్యాచిల‌ర్ల‌లో ఒక‌డిగా ఉన్నాడు రానా ద‌గ్గుబాటి. ఐతే ఎప్పుడు పెళ్లి గురించి అడిగినా.. ఇప్పుడిప్పుడే అందుకు అవ‌కాశ‌మే లేద‌న్న‌ట్లుగా మాట్లాడేవాడు. పెళ్లి గురించి కామెడీ చేసేవాడు. నేనా పెళ్లా అన్న‌ట్లుగా పంచులు వేసేవాడు. అలాంటి వాడు త‌న బాహుబ‌లి మిత్రుడు ప్ర‌భాస్‌ను ఒంట‌రివాడిని చేసి పెళ్లి పీట‌లు ఎక్కేశాడు. తాను ఎంగేజ్ అయిన విష‌యాన్ని రెండు నెల‌ల కింద‌టే వెల్ల‌డించిన రానా.. లాక్ డౌన్ అని కూడా చూడ‌కుండా పెళ్లాడేశాడు. శ‌నివార‌మే అత‌డి పెళ్లి కుటుంబ స‌భ్యులు, స‌న్నిహితులు,ప‌రిమిత సంఖ్య‌లో హాజ‌రైన బంధువులు, మిత్రుల మ‌ధ్య జ‌రిగింది.

ఐతే నేరుగా పెళ్లికి హాజ‌రు కాలేక‌పోయిన అంద‌రికీ వ‌ర్చువ‌ల్ రియాలిటీ ద్వారా త‌న పెళ్లి చూసే అవ‌కాశం క‌ల్పించాడు రానా. ఇందుకోసం వీఆర్ సెట్లు కూడా పంపించాడు. ఒక‌ప్పుడు బాహుబ‌లి సినిమాలోని మ‌హిష్మ‌తి రాజ్యానికి సంబంధించిన దృశ్యాలు చూసేందుకు ఇలాంటి ఏర్పాట్లే చేసిన సంగ‌తి తెలిసిందే. ఈ మార్గంలో రానా పెళ్లిని చూసిన టాలీవుడ్ సెల‌బ్రెటీలు ఒక్కొక్క‌రుగా ట్విట్ట‌ర్లో ఆస‌క్తిక‌ర రీతిలో స్పందిస్తున్నారు. ఐకానిక్ బ్యాచిల‌ర్ ముగింపును చూస్తున్నానంటూ.. వీఆర్‌లో రానా పెళ్లిని చూస్తున్న ఫొటోను నాని షేర్ చేశాడు. మ‌రోవైపు న‌వ‌దీప్ రానా పెళ్లిపై స్పందిస్తూ.. క‌నీ వినీ ఎరుగ‌ని రోజుకు శుభాకాంక్ష‌లు మిత్ర‌మా అని రానాను ట్యాగ్ చేశాడు. మరోవైపు రానా బాలీవుడ్ మూవీ బేబీ కో యాక్ట‌ర్ అక్ష‌య్ కుమార్ సైతం అత‌డి పెళ్లిపై స‌ర‌దాగా స్పందించాడు. జీవితంలో శాశ్వ‌తంగా లాక్ డౌన్ కావ‌డానికి ఇదే మార్గం అని అత‌ను కామెంట్ చేశాడు.

Tags