Gulte Telugu Telugu Political and Movie News Updates
ప్రీ రిలీజ్ ఫంక్షన్లో ప్రమోషన్లలో తమ సినిమా ఓటిటిలో త్వరగా రాదని నిర్మాతలు ఎంత గొప్పగా చెప్పుకుంటున్నా వాస్తవానికి పరిస్థితి ఇంకోలా ఉంది. హిట్ అనిపించుకున్న మేజర్ సరిగ్గా నెలకే నెట్ ఫ్లిక్స్ లో పెట్టేశారు. ముప్పై అయిదు రోజులకు బ్లాక్ బస్టర్ విక్రమ్ ని హాట్ స్టార్ ఇచ్చేస్తోంది. విరాట పర్వం ఎంత డిజాస్టర్ అయినా మరీ అన్యాయంగా రెండు వారాలకే స్మార్ట్ స్క్రీన్ కు తెచ్చేశారు. ఆర్ఆర్ఆర్, కెజిఎఫ్ లు ఫిఫ్టీ డేస్ తర్వాత దర్శనమిచ్చాయి. ఇవి అతి పెద్ద ప్యాన్ ఇండియా మూవీస్ కావడం వల్ల అంత గ్యాప్ సహజం.
కానీ ఎఫ్3 లాంటి కమర్షియల్ ఎంటర్ టైనర్ ఆలస్యంగా డిజిటల్ బాట పట్టడం ఆశ్చర్యకరం. జూలై 22న సోనీ లివ్ లో ఇది అందుబాటులోకి రానుంది. దిల్ రాజు చెప్పినట్టే రెండు నెలలకు దగ్గరలో చిన్ని తెరకు విడుదల చేస్తున్నారు. గతంలో ఈయన బ్యానర్ లో వచ్చిన చాలా సినిమాలు నెల రోజులకే ప్రైమ్ లో వచ్చిన దాఖలాలు ఉన్నాయి. కానీ ఎఫ్3కి మాత్రం రూటు మార్చారు. మాములుగా ప్రైమ్ లోనే రాజుగారి హిట్లు ఫ్లాపులు ఎక్కువగా ఉన్నాయి. భారీ మొత్తానికే సోనీ లివ్ తో మొదటిసారి టై అప్ పెట్టుకున్నారు.
ఇది ఒకరకంగా మంచిదే. ఇటీవలే నిర్మాతల మండలి ఓటిటి విషయంలో తీసుకున్న నిర్ణయాలకు అనుగుణంగా ఎఫ్3 రావడం విశేషం. ఇది ముందు అగ్రిమెంట్ చేసుకున్నదే అయినా ఇకపై రాబోయే కొత్త సినిమాలు కూడా ఇదే రూట్ పడతాయా లేదానేది చూడాలి. ఎఫ్3 థియేటర్లలో బాగానే ఆడింది కాబట్టి ఇబ్బంది లేదు. అలా కాకుండా జనం తిరస్కరించిన వాటిని నెలల పాటు అట్టిపెట్టి ఆ తర్వాత ఓటిటిలో వేస్తే ఆడియన్స్ లో మిగిలిన కొద్దిపాటి ఆసక్తి కూడా చల్లారిపోవచ్చు. ఇంకొద్ది నెలలు ఆగితే ఈ పరిణామాల గురించి క్లారిటీ వస్తుంది.
