కేజీఎఫ్2.. కేవలం నాలుగు రోజుల్లోనే

మూడున్నరేళ్ల కిందట సంచలన విజయం సాధించిన ‘కేజీఎఫ్-చాప్టర్ 1’కు కొనసాగింపుగా వచ్చిన ‘కేజీఎఫ్- చాప్టర్ 2’ మీద ముందు నుంచి భారీ అంచనాలే ఉన్నాయి. ఆ సినిమా బాక్సాఫీస్ దగ్గర వసూళ్ల మోత మోగిస్తుందని అందరికీ తెలుసు. వివిధ భాషల్లో అడ్వాన్స్ బుకింగ్స్ ట్రెండ్స్ చూసినపుడే ఓపెనింగ్స్ మీద ఒక అంచనా ఏర్పడింది. కానీ ఆ అంచనాలను మించిపోయి బాక్సాఫీస్ దగ్గర అద్భుతాలు చేస్తోందా చిత్రం. కేవలం నాలుగు రోజుల్లోనే రూ.500 కోట్ల క్లబ్బులో ఈ సినిమా చేరడం అసాధారణమైన విషయం.

రాజమౌళి సినిమా ‘ఆర్ఆర్ఆర్’కు దీటుగా ఈ సినిమా వసూళ్లు సాధించడం షాకింగే. తొలి నాలుగు రోజుల వ్యవధిలో ‘ఆర్ఆర్ఆర్’ వరల్డ్ వైడ్ రూ.538 కోట్ల గ్రాస్ కలెక్షన్లు రాబడితే.. ‘కేజీఎఫ్-2’ ఇన్ని రోజుల్లో రూ.540 కోట్ల మార్కుకు చేరువగా వెళ్లినట్లుగా ట్రేడ్ పండిట్లు చెబుతున్నారు. కాకపోతే ‘కేజీఎఫ్-2’ గురువారమే రిలీజ్ కావడం వల్ల నాలుగో రోజు ఆదివారం అయింది. ‘ఆర్ఆర్ఆర్’ శుక్రవారం రిలీజ్ కావడం వల్ల నాలుగో రోజు సోమవారం వచ్చింది. అయినా సరే.. రాజమౌళి-ఎన్టీఆర్-రామ్ చరణ్ కాంబినేషన్లో తెరకెక్కిన సినిమాకు.. ప్రశాంత్ నీల్-యశ్ సినిమా దీటుగా నిలబడటం మామూలు విషయం కాదు.

రిలీజ్ రోజు నుంచి ప్రతి రోజూ ఈ చిత్రం రూ.100 కోట్లకు తక్కువ కాకుండా గ్రాస్ వసూళ్లు రాబట్టింది. ‘కేజీఎఫ్-2’ వసూళ్లు ఇంత భారీగా ఉండటంతో హిందీ వెర్షన్ కీలక పాత్ర పోషిస్తోంది. ‘ఆర్ఆర్ఆర్’కు హిందీలో ఓ మోస్తరుగానే వచ్చాయి కలెక్షన్లు. తొలి నాలుగు రోజుల్లో వంద కోట్లకు అటు ఇటుగా ‘ఆర్ఆర్ఆర్’ హిందీ వెర్షన్ వసూళ్లు రాబడితే.. ‘కేజీఎఫ్-2’ మాత్రం అన్నే రోజుల్లో రూ.190 కోట్లకు పైగా కలెక్షన్లు తెచ్చుకుంది. నాలుగు రోజుల్లోనే రూ.500 కోట్ల మార్కును అందుకున్న ఈ చిత్రానికి రెండో వీకెండ్లో అసలు పోటీయే లేని నేపథ్యంలో ఫుల్ రన్లో రూ.1000 కోట్ల వసూళ్ల మార్కును అందుకోవడం కూడా కష్టం కాకపోవచ్చు.