ఓజి యునివర్స్ ఊహించనంత పెద్దగా

ఏపీ డిప్యూటీ సిఎం పవన్ కళ్యాణ్ పుట్టినరోజు సందర్భంగా ఇవాళ అభిమానులు ఎదురు చూసిన కీలక అప్డేట్ ఓజి 2. తమన్ దీని గురించి ఆ మధ్య కొన్ని ఈవెంట్లలో తెగ ఊరించాడు. సెప్టెంబర్ 2 దాకా వెయిట్ చేయండి, మీకు అదిరిపోయే కానుక వస్తుందని అభిమానులకు ఆశ కలిగించాడు. మరీ అంత స్థాయిలో కాదు కానీ ఉన్నంతలో ఒక డీసెంట్ అప్డేట్ దర్శకుడు సుజిత్ నుంచి వచ్చింది. ఓజి యునివర్స్ ని మరింత విస్తరించబోతున్నట్టు ఒక వీడియో ద్వారా చెప్పేశారు.

ఆ మధ్య తను, తమన్ ఇద్దరూ పవన్ కళ్యాణ్ ని కలిసి ఒక డిస్కషన్ చేసిన సంగతి తెలిసిందే. దాని ఫోటోలు సోషల్ మీడియాలో బాగా వైరల్ అయ్యాయి. ఇప్పుడు దాని క్లిప్పులనే జోడించి ఓజి 2 ఎలా ఉండబోతోందో చిన్న ఐడియా ఇచ్చారు. జపాన్ సమురాయ్ యోధుడిగా పవన్ ని చూపించడం, సుభాష్ చంద్ర బోస్ లాంటి ఫ్రీడమ్ ఫైటర్ల రెఫరెన్సులు పెట్టడం, ఓజికి పని చేసే అందరికీ లైఫ్ టైం మెమరీ కావాలనే సంకల్పాన్ని పవన్ వెలిబుచ్చడం ఇందులో ఉన్నాయి.

సరే ఇదంతా చూసి ఓజి 2 త్వరలోనే సెట్స్ పైకి వెళ్లపోతుందని అనుకోవడానికి లేదు. ఎందుకంటే సుజిత్ ముందు నానితో బ్లడీ రోమియో పూర్తి చేయాలి. ఇంకా స్టార్ట్ కాలేదు కానీ ఒక్కసారి మొదలుపెట్టాక నాన్ స్టాప్ షూటింగ్ చేసేందుకు పక్కా ప్లానింగ్ తో ఉన్నారు. అధిక భాగం విదేశాల్లో జరుగుతుంది కాబట్టి ఇబ్బందేం లేదు. అదయ్యాక ఓజి 2 పనులు ఉంటాయి. ప్రస్తుతం కేరళలో చికిత్స తీసుకుంటున్న పవన్ తిరిగి వచ్చాక చాలా విషయాల గురించి క్లారిటీ రావాల్సి ఉంది.

ఎలా చూసుకున్నా 2027 వేసవి కన్నా ముందు ఓజి 2 సెట్స్ పైకి వెళ్లకపోవచ్చు. అంటే సినిమా విడుదల 2028లో ఉంటుంది. సో కొంచెం ఎక్కువ వెయిటింగ్ తప్పేలా లేదు. హెల్త్ దృష్ట్యా ఇంతకు ముందు అంత వేగంగా పవన్ కళ్యాణ్ పరుగులు పెట్టకపోవచ్చు. సురేందర్ రెడ్డితో ప్లాన్ చేసుకున్న యాక్షన్ ఎంటర్ టైనర్ కూడా ప్రస్తుతం పెండింగ్ లోనే ఉంది. 2029 ఎన్నికలు వచ్చేలోగా పవన్ కళ్యాణ్ నుంచి కనీసం రెండు సినిమాలు రావాలని ఫ్యాన్స్ కోరుకుంటున్నారు.