నాని మీద ఒత్తిడి పెరుగుతోంది

ఆగస్ట్ నుంచి తప్పుకున్నాక ది ప్యారడైజ్ కొత్త విడుదల తేదీ ఇప్పటిదాకా ప్రకటించలేదు. సెప్టెంబర్ 24 అని బలంగా ప్రచారం జరిగింది కానీ ప్రొడక్షన్ హౌస్ నుంచి ఎలాంటి ప్రకటన రాలేదు. ఈ నేపథ్యంలో నాని మీద ఒత్తిడి పెరుగుతోందని ఇన్ సైడ్ టాక్. దర్శకుడు శ్రీకాంత్ ఓదెల పర్ఫెక్షన్ పేరుతో ఎక్కువ సమయం తీసుకోవడం పరిస్థితి ఇంకా కిందకు తీసుకెళ్లేలా ఉండటంతో, నాని స్వయంగా రంగంలోకి దిగి పనులు వేగంగా జరిగేలా చొరవ తీసుకున్నట్టు ఇన్ సైడ్ టాక్.

ఒక ప్యాన్ ఇండియా మూవీకి డేట్లు మారుతూ వెళ్లి ఆలస్యం చేస్తూ పోతే దాని బజ్ మీద ఎంత ప్రభావం పడుతోందో ఇటీవలే వచ్చిన పెద్ది దీన్ని ఋజువు చేసింది. చికిరి చికిరి టైంలో ఉన్న హైప్ కి ట్రైలర్ వచ్చిన తర్వాత చూసిన రెస్పాన్స్ కి అసలు సంబంధమే లేనట్టుగా అయ్యింది. అయినా సరే రామ్ చరణ్ ఇమేజ్ ఓ మూడు వందల కోట్ల దాకా లాగింది కానీ బయట మార్కెట్లలో చేతులు ఎత్తేసింది. ప్యారడైజ్ ఇలాంటి పొరపాట్లు చేయకుండా జాగ్రత్తగా ఉండాలి.

ఖచ్చితంగా సెప్టెంబర్ లో రావడం తప్ప వేరే ఆప్షన్ లేదని కూడా వినిపిస్తోంది. ఓటిటితో చేసుకున్న డీల్ కారణంగా ఇంత కన్నా లేట్ చేస్తే ఇచ్చే మొత్తంలో కోత విధించే అవకాశాలు ఉన్నాయట. అంతదాకా రాకుండా టీమ్ ఉరుకులు పరుగులు పెడుతోందని అంతర్గతంగా వినిపిస్తోంది. అనిరుధ్ రవిచందర్ పూర్తి ఆల్బమ్ ఇచ్చాడా లేదానే క్లారిటీ కూడా లేదు. రెండో పాటని వదులుతామని ఆ మధ్య ఊరించారు కానీ ఇప్పుడసలు దాని ఊసే లేకుండా పోయింది.

వేగానికి మారుపేరుగా ఉన్న నాని స్పీడ్ గత ఏడాదిగా తగ్గిపోయింది. హిట్ 3 వచ్చి ఏడాది దాటేసింది. ప్యారడైజ్ విపరీతమైన ఆలస్యానికి గురయ్యింది. బ్లడి రోమియో అనౌన్స్ మెంట్ ఇచ్చాక అప్డేట్స్ ఆగిపోయాయి. దర్శకుడు సుజిత్ హఠాత్తుగా ఓజి 2కి షిఫ్ట్ అయిపోవడం న్యాచురల్ స్టార్ అభిమానులను కన్ఫ్యూజ్ చేసింది. మరో ఇద్దరు దర్శకులు నానితో సినిమాల కోసం లైనప్ లో ఉన్నారు. ఇవన్నీ బ్యాలన్స్ కావాలంటే ముందైతే నాని ప్యారడైజ్ ని జపాన్ ట్రైన్ రేంజ్ లో పరిగెత్తించాలి.