కమల్ హాసన్ రికార్డుని కమెడియన్ దాటేశాడు

కమల్ హాసన్ ఎన్నో అద్భుతమైన సినిమాల్లో లెక్కలేనన్ని గొప్ప పాత్రలు పోషించారు. వాటిలో దశావతారంది ప్రత్యేక స్థానం. ఎందుకంటే ఎవరికీ సాధ్యం కాని విధంగా ఏకంగా పది పాత్రల్లో నటించి ఆల్ టైం రికార్డు సృష్టించారు. అంతకు ముందు ఒకే సినిమాలో తొమ్మిది క్యారెక్టర్లు చేసిన శివాజీ గణేశన్, ఏఎన్ఆర్ లను దాటేసి తన పేరు లిఖించుకున్నారు. తర్వాత ఎవరూ ఈ ఫీట్ సాధించలేదు. మహా అయితే జూనియర్ ఎన్టీఆర్, కళ్యాణ్ రామ్ లాంటి హీరోలు ట్రిపుల్ రోల్స్ చేశారు.

ఇదిలా ఉండగా ఇన్ని సంవత్సరాల దశావతారం రికార్డుని ఒక హాస్య నటుడు బ్రేక్ చేస్తున్నాడు. యోగిబాబు హీరోగా తమిళంలో రూపొందుతున్న ఒక మూవీలో అతను ఏకంగా 11 పాత్రల్లో కనిపించబోతున్నాడు. ఇవి కేవలం గెటప్స్ కాదు. కథ ప్రకారం అన్ని వేషాల్లో యోగిబాబు పరకాయ ప్రవేశం ఉంటుంది. కిషోర్ అనే యువకుడు దీనికి దర్శకత్వం వహిస్తున్నాడు. హనుమాన్ జంక్షన్, చిరంజీవి గాడ్ ఫాదర్ ఫేమ్ మోహన్ రాజా దగ్గర అసిస్టెంట్ గా పని చేసిన అనుభవముంది.

స్టోరీ దాచే ప్రయత్నం టీమ్ చేయలేదు. ఒక ఆర్మీ హెలికాఫ్టర్ కూలిపోతే అందులో బ్లాక్ బాక్స్ తెచ్చి ప్రభుత్వానికి ఇవ్వడం కోసం హీరో బయలుదేరతాడు. ఈ క్రమంలో ఎదురయ్యే చిత్ర విచిత్ర సంఘటనలే ఈ సినిమా కథ. హీరో, విలన్, కమెడియన్, డబుల్ యాక్షన్ ఇలా ఎన్నో షేడ్స్ లో యోగిబాబు కనిపిస్తారట. అలాని ఏదో తక్కువ బడ్జెట్ అనుకునేరు. ఇంగ్లాండ్, కెన్యా దేశాల్లో షెడ్యూల్స్ ప్లాన్ చేశారు. ఆయన కెరీర్ లోనే అత్యంత భారీ బడ్జెట్ తో రూపొందుతోంది.

తెలుగుతో సహా అన్ని ప్రధాన భాషల్లో ఈ సినిమా రిలీజ్ చేస్తారు. వినడానికి బాగానే ఉంది కానీ స్టోరీ ప్రకారం సహజంగా పదకొండు పాత్రలు ఉంటే బాగుంటుంది కానీ అదేదో రికార్డు కోసం కృత్రిమంగా ఇరికిస్తే మాత్రం మిస్ ఫైర్ అవుతుంది. నవరాత్రి, దశావతారంలు స్టార్లు నటించిన ఆల్ టైం క్లాసిక్స్. కానీ కేవలం హాస్య నటుడిగా గుర్తింపు ఉన్న యోగిబాబుతో ఇంత పెద్ద రిస్క్ చేయిస్తున్నారంటే కంటెంట్ లో ఏదో మ్యాటర్ ఉన్నట్టుంది. ఈ ఏడాదే విడుదలవుతుందట.