66 ఏళ్ల వయసులో ఇదేమీ ఎనర్జీ సామి

వయసు ఒక అంకె మాత్రమే అని రుజువు చేసే హీరోలు కొందరుంటారు. ఫిట్‌నెస్ కాపాడుకుంటూ.. సూపర్ లుక్ మెయింటైన్ చేస్తూ.. ఆన్ స్క్రీనే కాదు, ఆఫ్ స్క్రీన్లోనూ తమదైన ఉత్సాహం చూపిస్తూ దూసుకెళ్తుంటారు. మలయాళంలో ఇద్దరు టాప్ స్టార్లు మమ్ముట్టి, మోహన్ లాల్‌లను చూస్తే ఒకరికి 74 ఏళ్లు, ఇంకొకరికి 66 ఏళ్లు అంటే నమ్మశక్యంగా అనిపించదు. ఇద్దరూ ఈ వయసులోనూ సూపర్బ్ లుక్‌లో కనిపిస్తుంటారు.

ఇక లాలెట్టన్ విషయానికి వస్తే.. ఈ వయసులోనూ ఇటు ఫైట్లు, అటు డ్యాన్సుల్లో తనకు తిరుగులేదని చాటుతూ ఉంటారు. స్టేజ్ మీద ఆయన చూపించే ఉత్సాహమే వేరు. తాజాగా ఒక సినీ ఈవెంట్లో 66 ఏళ్ల మోహన్ లాల్ చేసిన సందడి అంతా ఇంతా కాదు. తన వయసులో సగం కూడా లేని అమ్మాయిలతో కలిసి ఆయన స్టేజ్‌ మీద వేసిన స్టెప్పులు చూసి అందరూ ముక్కున వేలేసుకున్నారు.

తమ్ముడు, శంబాల లాంటి తెలుగు చిత్రాల్లో నటించిన శ్వాసికతో పాటు సానియా అయ్యప్పన్‌లతో కలిసి మోహన్ లాల్ వీర లెవెల్లో స్టెప్పులేసి ఆశ్చర్యపరిచారు. పాత సినిమాల్లో ఆయన మాస్ డ్యాన్సుల గురించి కొత్తగా చెప్పాల్సిన పని లేదు. అవి తెలుగు సోషల్ మీడియాలో కూడా సూపర్ పాపులర్. తెలుగులో వచ్చే ప్రతి పాపులర్ సాంగ్‌కీ ఆయన డ్యాన్సులను సింక్ చేసి మీమ్స్ చేస్తుంటారు మన వాళ్లు. ఐతే ఇప్పటికీ తనలో ఉత్సాహం తగ్గలేదని చాటుతూ శ్వాసిక, సానియాలతో కలిసి రొమాంటిగ్గా స్టెప్పులేసి అలరించారు లాలెట్టన్.

ఐతే ఆయన డ్యాన్సులు ఒక్క పాటకు పరిమితం కాలేదు. మూణ్నాలుగు సాంగ్స్‌కి డ్యాన్స్ చేసి తన ఉత్సాహాన్ని చాటారు. ప్రతి పాటకూ కాస్ట్యూమ్స్ మార్చుకుని కుర్రాళ్ల తరహాలో ఆయన చూపించిన జోష్‌కు ఫిదా అవ్వాల్సిందే. వీటి కోసం ఆయనెంత రిహార్సల్స్ చేసి ఉంటారో కూడా అర్థం చేసుకోవచ్చు. అంతటితో ఆగకుండా లెజెండరీ సింగర్ కె.ఎస్.చిత్రతో కలిసి ఆయన ఒక పాట కూడా పాడారు. ఇటీవలే లాలెట్టన్ ‘దృశ్యం-3’ రూపంలో భారీ విజయాన్నందుకున్న సంగతి తెలిసిందే.