రవితేజ అలా.. కళ్యాణ్ రామ్ ఇలా

రవితేజ అలా.. కళ్యాణ్ రామ్ ఇలా

ఒకప్పుడు తెలుగు సినిమాలు మినిమం రెండున్నర గంటలుండేవి. అంతకుమించిన నిడివితో కూడా తరచుగా సినిమాలు వచ్చేవి. కానీ గత దశాబ్ద కాలంలో పరిస్థితి మారింది. ఇప్పటి ప్రేక్షకులు లెంగ్త్ ఎక్కువున్న సినిమాల్ని ఆదరించరన్న అభిప్రాయం బలపడి.. సినిమాల నిడివిని తగ్గించే ట్రెండు మొదలైంది. చాలా వరకు రెండు రెండుంబావు గంటల నిడివితో సినిమాల్ని విడుదల చేయడం పెరిగిపోయింది.

మెజారిటీ సినిమాలు ఆ లెంగ్త్ తోనే ఉంటున్నాయి. కొన్నిసార్లు ఎక్కువ నిడివితో సినిమాను రిలీజ్ చేసి.. ప్రేక్షకుల స్పందనను బట్టి.. విడుదల తర్వాత కోతలు పెట్టిన సందర్భాలు కూడా ఉన్నాయి. ఐతే ఈ ట్రెండుకు బ్రేక్ వేస్తూ ఇటీవల కొన్ని భారీ సినిమాలు ఎక్కువ నిడివితో రిలీజై మంచి ఫలితాన్నందుకున్నాయి. ‘రంగస్థలం’.. ‘భరత్ అనే నేను’.. ‘సావిత్రి’.. ఈ సినిమాలన్నీ దాదాపు మూడు గంటల నిడివితో ఉన్నవే. ‘నా పేరు సూర్య’ కూడా 2 గంటల 48 నిమిషాల లెంగ్త్ తో రిలీజైంది.

నిడివి ఎక్కువున్న సినిమాలకు మంచి ఫలితాలొస్తున్న నేపథ్యంలో ఈ ట్రెండ్ ఇలాగే కొనసాగుతుందని భావిస్తుండగా.. మాస్ రాజా రవితేజ కొత్త సినిమా ‘నేల టిక్కెట్టు’ అదే బాటలో పయనించింది. ఈ చిత్ర నిడివి 2 గంటల 47 నిమిషాలుండటం విశేషం. ఐతే పైన చెప్పుకున్న సినిమాల స్టయిల్ వేరు. అవి రొటీన్ మాస్ మసాలా సినిమాలు కావు కాబట్టి జనాలు ఓకే చేశారు. కానీ రెగ్యులర్ కమర్షియల్ సినిమాలా కనిపిస్తున్న ‘నేల టిక్కెట్టు’కు కూడా ఇంత నిడివి అవసరమా అన్న అభిప్రాయాలు వ్యక్తమవుతున్నాయి.

ఐతే వచ్చే శుక్రవారమే ‘నేల టిక్కెట్టు’కు పోటీగా విడుదలవుతున్న నందమూరి కళ్యాణ్ రామ్ కొత్త సినిమా మాత్రం దీనికి భిన్నంగా ఉండబోతోంది. ఆ చిత్రాన్ని రెండు గంటల లోపు నిడివితో రిలీజ్ చేస్తుండటం విశేషం. దీని లెంగ్త్ 1 గంట 58 నిమిషాలేనట. ఫీల్ గుడ్ లవ్ స్టోరీలా కనిపిస్తున్న ఈ చిత్రం క్రిస్ప్ గా ఉంటేనే మంచిదని లెంగ్త్ అలా ఫిక్స్ చేశారట. ఈ చిత్ర దర్శకుడు జయేంద్ర ఇంతకుముందు తీసిన ‘180’కి లెంగ్త్ పెద్ద సమస్యగా మారింది. ఈ నేపథ్యంలో ‘నా నువ్వే’ విషయంలో అప్రమత్తం అయినట్లున్నారు. మరి ఈ రెండు సినిమాల ఫలితాలపై నిడివి ఎలాంటి ప్రభావం చూపిస్తుందో చూడాలి.

 

రాజకీయ వార్తలు

 

సినిమా వార్తలు