రూ.2 వేల నోట్ల మిస్టరీ ఇంకా వీడలేదా?

కేంద్ర ప్రభుత్వం ప్రకటించిన రూ.2 వేల నోట్ల ఉపసంహరణ తర్వాత కూడా, ఈ నోట్ల మిగతా చలామణి ఇంకా పూర్తి కాలేదని రిజర్వ్ బ్యాంక్ ఆఫ్ ఇండియా తాజాగా వెల్లడించింది. అధికారిక గణాంకాల ప్రకారం, ఇప్పటివరకు 98.18 శాతం నోట్లు బ్యాంకులకు తిరిగి చేరినప్పటికీ, ప్రజల వద్ద ఇంకా రూ.6,471 కోట్ల విలువ చేసే రూ.2 వేల నోట్లు మిగిలి ఉన్నాయని రిజర్వ్ బ్యాంక్ నివేదిక తెలియజేసింది. ఈ పరిస్థితి, మరింత ఆసక్తికర చర్చలకు దారితీస్తోంది.

2023 అక్టోబర్ 7న బ్యాంకుల ద్వారా ఈ నోట్ల మార్పిడి పూర్తి చేయగా, ఆ తర్వాత మార్పిడికి అవకాశం కేవలం ఆర్బీఐ ప్రాంతీయ కార్యాలయాలకే పరిమితం చేశారు. అయినప్పటికీ, ఇప్పటికీ ప్రజలు తమ వద్ద ఈ నోట్లను ఉంచుకోవడం వెనుక కారణాలేంటి నోట్లను బ్యాంకులకు ఎందుకు తిరిగి ఇవ్వడం లేదు? అనే ప్రశ్నలు పెరుగుతున్నాయి. కొందరు ఈ నోట్లను మరింత సమయానికి దాచుకోవాలనుకుంటున్నారా లేక ఇంకొంతమంది రిజర్వ్ బ్యాంక్ మార్గదర్శకాలను అర్థం చేసుకోలేకపోతున్నారా? అనే అంశాలపై చర్చ నడుస్తోంది.

రాజకీయ ఆర్థిక విశ్లేషకుల అభిప్రాయం ప్రకారం, ప్రజల్లో నోట్ల మార్పిడి ప్రక్రియపై పూర్తిగా అవగాహన లేకపోవడం కూడా ఒక కారణమై ఉండొచ్చని చెబుతున్నారు. చాలామంది ఇప్పటికీ బ్యాంకుల ద్వారా నోట్లను మార్పిడి చేయవచ్చని భావిస్తున్నట్టు తెలుస్తోంది. కానీ ఆ అవకాశం కేవలం ఆర్బీఐ కార్యాలయాల వద్ద మాత్రమే ఉందని తెలియకపోవడం వల్ల, ప్రజలు తమ వద్ద ఈ నోట్లను ఉంచుకునే పరిస్థితి ఏర్పడిందని భావిస్తున్నారు.

ఇప్పటికీ ఎవరికైనా రూ.2 వేల నోట్లను మార్చుకోవాల్సిన అవసరం ఉంటే, వారి దగ్గరి రిజర్వ్ బ్యాంక్ ప్రాంతీయ కార్యాలయానికి వెళ్లడం లేదా పోస్టల్ సేవల ద్వారా పంపించడం ద్వారా మార్పిడి చేసుకునే వీలుందని ఆర్బీఐ వెల్లడించింది. దీని ద్వారా నోట్ల ఉపసంహరణను మరింత వేగంగా పూర్తి చేయాలని ప్రయత్నిస్తున్నట్టు స్పష్టమవుతోంది. కానీ ప్రజలు ఈ ప్రక్రియను ఎలా స్వీకరిస్తారనే అంశంపై ఇప్పటికీ అనుమానాలు కొనసాగుతున్నాయి. మొత్తానికి, ప్రభుత్వం తీసుకున్న ఈ నిర్ణయం తర్వాత కూడా రూ.2 వేల నోట్ల మిస్టరీ పూర్తిగా పరిష్కారమవ్వలేదనే చెప్పాలి. చలామణిలో ఇంకా నోట్లు మిగిలే పరిస్థితి కొనసాగుతూనే ఉంది. రానున్న రోజుల్లో వీటి భవిష్యత్తు ఏ రూపంలో మారుతుందో చూడాలి.