కాన్సర్ట్ షోలతో ఊహించని ఆదాయం.. ఏ రేంజ్ లో ఉందంటే..

ఇటీవల ఇండియాలో నిర్వహించిన బ్రిటిష్ రాక్ బ్యాండ్ కోల్డ్‌ప్లే వంటి భారీ లైవ్ షో ఈవెంట్‌లు దేశంలో సంగీత వినోద రంగాన్ని విస్తరిస్తున్నాయి. ప్రత్యేకించి, అహ్మదాబాద్‌లోని నరేంద్ర మోదీ స్టేడియంలో జనవరి 25, 26 తేదీల్లో జరిగిన మ్యూజిక్ ఆఫ్ ద స్పియర్‌స్ వరల్డ్ టూర్ కన్సర్ట్‌కు 2.2 లక్షల మంది హాజరయ్యారు.

ఇది దేశంలో ఇప్పటి వరకు జరిగిన అతిపెద్ద స్టేడియం కాన్సర్ట్‌గా నిలిచింది. ఈ షోలతో భారతదేశం మ్యూజిక్ ఎకానమీకి ఒక కొత్త రూపాన్ని చూపించిందని చెప్పాలి.

అహ్మదాబాద్‌లో నిర్వహించిన ఈ భారీ షోకి దేశవ్యాప్తంగా, విదేశాల నుంచి కూడా సంగీత ప్రియులు భారీ సంఖ్యలో తరలివచ్చారు. కన్సర్ట్‌కు వచ్చినవారిలో 70% మంది బహిరంగ ప్రాంతాల నుండి వచ్చినవారేనని అంచనా.

ముంబై నుంచి వచ్చిన ఒక సంగీతాభిమాని అయితే హోటల్ ఖర్చు ఆదా చేసుకోవడానికి ప్రత్యేకంగా రైలు ప్రయాణం చేశాడట. కొందరు కన్సర్ట్ కోసం రూ.6,000 టికెట్ కొంటే, మరికొందరు హోటల్ ఖర్చుతో కలిపి రూ.25,000 వెచ్చించినవారు కూడా ఉన్నారు. ఇదంతా సంగీత వినోదానికి దేశవ్యాప్తంగా ఉన్న విపరీతమైన డిమాండ్‌ను స్పష్టంగా చూపిస్తుంది.

ఈ లైవ్ షోను డిస్నీ+ హాట్‌స్టార్ డిజిటల్ ప్లాట్‌ఫామ్‌లో ప్రత్యక్ష ప్రసారం చేయగా భారీ రెస్పాన్స్ వచ్చింది. 83 లక్షల మంది దీన్ని ఆన్‌లైన్‌లో వీక్షించగా, మొత్తం 16.5 కోట్ల నిమిషాల వాచ్‌టైమ్ నమోదైంది. ఈ విధంగా టెక్నాలజీ వినియోగంతో లైవ్ కన్సర్ట్ అనుభూతిని ఇంట్లోనే పొందేలా చేయడం భారతదేశంలో సంగీత వినోద రంగం మరింత విస్తరించేందుకు సహాయపడనుంది.

ఈ విజయంతో అంతర్జాతీయ స్థాయి గాయకులు టేలర్ స్విఫ్ట్, బియాన్స్ వంటి వారు కూడా భారత మార్కెట్‌పై ఆసక్తి చూపే అవకాశం ఉందని ఈవెంట్స్ నిర్వాహకుడు ఆండ్రే టిమ్మిన్స్ అభిప్రాయపడ్డారు.

ఇండియాలో లైవ్ ఈవెంట్స్ రంగం గత కొన్నేళ్లుగా గణనీయంగా పెరుగుతోంది. 2023లో మాత్రమే ఈ రంగం 20% వృద్ధి సాధించి, రూ.8,800 కోట్ల మార్కును దాటింది. ప్రభుత్వ కార్యక్రమాలు, టికెట్ బేస్డ్ ఈవెంట్స్, మెగా మ్యారేజ్ ఫంక్షన్స్ ఈ వృద్ధికి ప్రధాన కారకాలు. అలాగే, ఒక నివేదిక ప్రకారం, 63% మార్కెటింగ్ సంస్థలు తమ ఈవెంట్స్ వ్యయాన్ని వచ్చే రెండేళ్లలో పెంచాలని యోచిస్తున్నాయి.

విజయవాడ, విశాఖ, సూరత్, పట్నా, కోచిన్, తిరువనంతపురం వంటి నగరాల్లో కూడా ఈ మెగా ఈవెంట్స్ విస్తరిస్తున్నాయి. ఇది భారతదేశపు లైవ్ కన్సర్ట్ మార్కెట్‌ను మరో కొత్త స్థాయికి తీసుకెళ్తుందని విశ్లేషకులు భావిస్తున్నారు. ఈ దిశగా, కన్సర్ట్ ఎకానమీ భారతదేశంలో భవిష్యత్తులో మరింత మెరుగైన వృద్ధిని సాధించనుంది.