కవితకు కన్ఫర్మ్.. కేకేకు హ్యాండేనట

కవితకు కన్ఫర్మ్.. కేకేకు హ్యాండేనట

రాష్ట్ర విభజన నేపథ్యంలో ఏపీకి 11 రాజ్యసభ స్థానాల్ని.. తెలంగాణకు ఏడు రాజ్యసభ స్థానాల్ని కేటాయించిన ముచ్చట పాతదే. తెలంగాణలోని ఏడు స్థానాల్లో ఐదు టీఆర్ఎస్ కు చెందిన సంతోష్.. బండా ప్రకాశ్.. బడుగుల లింగయ్య యాదవ్.. కెప్టెన్ వి. లక్ష్మీకాంతరావు.. డి. శ్రీనివాస్ ప్రాతినిధ్యం వహిస్తున్నారు. మరో రెండు స్థానాలకు బీజేపీకి చెందిన గరికపాటి మోహన్ రావు (అప్పట్లో టీడీపీ).. కాంగ్రెస్ నేత కేవీపీ రామచందర్ రావు ప్రాతినిధ్యం వహిస్తున్నారు. కలిసి ఉన్నప్పుడు తెలంగాణ నుంచి ఆంధ్రా వారు.. ఆంధ్రా నుంచి తెలంగాణ నేతలు సీట్లు షేర్ చేసుకునేవారు.

దీనికి తగ్గట్లే ప్రస్తుతం రాజ్యసభ సభ్యులైన కేకే విషయాన్నే చూస్తే.. ఆయన ఆంద్రా కోటాలో ఉన్నారు. మరికొద్ది రోజుల్లో రెండు తెలుగు రాష్ట్రాలకు సంబంధించి ఆరుగురు రాజ్యసభ సభ్యులు పదవీ విరమణ చేయనున్నారు. ఇందులో ఏపీకి చెందిన నాలుగు..తెలంగాణకు చెందిన రెండు స్థానాలు ఉన్నాయి. తెలంగాణ అసెంబ్లీలో టీఆర్ఎస్ కు ఉన్న ఎమ్మెల్యే సంఖ్య రీత్యా.. రెండు రాజ్యసభ స్థానాలు టీఆర్ఎస్ ఖాతాలోకే రానున్నాయి. ఇలాంటివేళ.. ఈ రెండింటికి ఎవరిని ఎంపిక చేయనున్నారు? అన్నది ఆసక్తికరంగా మారింది.

ఏప్రిల్ తొమ్మిదిన రాజ్యసభ స్థానాలు ఖాళీ అవుతున్నప్పటికి దీనికి సంబంధించిన ఎన్నికల ప్రక్రియ ఫిబ్రవరిలోనే జరగనుంది. ఈ నేపథ్యంలో రెండు రాజ్యసభ స్థానాలు ఎవరికి దక్కనున్నాయి? అన్నది ప్రశ్నగా మారింది. తాజాగా అందుతున్న సమచారం ప్రకారం  ఏపీ నుంచి ప్రాతినిధ్యం వహిస్తున్న కేకేకు ఈసారికి రెన్యువల్ లేనట్లేనని చెబుతున్నారు. పార్టీలో కీలక స్థానంలో ఉండటమే కాదు.. సీఎం కేసీఆర్ కు అత్యంత సన్నిహితంగా ఉన్నప్పటికి ఆయనకు రెన్యువల్ అసాధ్యమని.. ఇప్పటికైతే హ్యాండ్ ఇచ్చినట్లేనని చెబుతున్నారు.

వయసు కారణాన్ని చూపించి పార్టీ పదవికి పరిమితం చేయటం కానీ.. మరేదైనా పదవిని కానీ ఇవ్వొచ్చు కానీ రాజ్యసభ స్థానాన్ని మాత్రం రెన్యువల్ చేసే అవకాశం లేనట్లేనని తెలుస్తోంది. మరి.. ఎవరికి అవకాశం దక్కనుందన్నది చూస్తే.. సీఎం కుమార్తె.. మాజీ ఎంపీ.. గత ఎన్నికల్లో నిజామాబాద్ ఎంపీగా బరిలోకి దిగి ఓడిన కవితకు రాజ్యసభ స్థానం దక్కవచ్చని చెబుతున్నారు.

ఢిల్లీకి సంబంధించిన వ్యవహారాలు గతంలో వినోద్ చూసేవారు. ఆయన సైతం గత ఎన్నికల్లో ఓడటం.. అనంతరం ఆయనకు తెలంగాణ రాష్ట్ర ప్రణాళికా సంఘం ఉపాధ్యక్షుడిగా ఎంపిక చేయటం తెలిసిందే. దీంతో.. ఢిల్లీలో కేసీఆర్ కు నమ్మకంగా వ్యవహారాల్ని చక్కదిద్దే పనిని కవితకు మించి ఎవరు చేయగలరని.. అందుకే ఆమెకు అవకాశం ఇవ్వాలని భావిస్తున్నట్లు చెబుతున్నారు. భాష మీద.. విషయాల మీద ఆమెకున్న అవగాహన నేపథ్యంలో రాజ్యసభ సభ్యురాలిగా ఎంపిక ఖాయమంటున్నారు.

రెండో స్థానాన్ని ఎవరికి కేటాయిస్తారన్న దానిపైనే స్పష్టత రావటం లేదు. తెర మీదకు చాలానే పేర్లు వచ్చినా.. వాటిల్లో ఒకటి కానీ..కొత్త పేరు ఏదైనా వచ్చినా ఆశ్చర్యపోవాల్సిన అవసరం లేదంటున్నారు. ఎందుకంటే.. అక్కడున్నది కేసీఆర్ అన్న విషయాన్ని మర్చిపోకూడదంటున్నారు. ఇప్పటివరకూ వినిపిస్తున్న పేర్ల జాబితా పెద్దదిగా ఉన్నప్పటికీ.. ఇందులో ఎవరికి పక్కా అన్నది మాత్రం చెప్పలేని పరిస్థితి.

ప్రస్తుతం వినిపిస్తున్న పేర్ల విషయానికి వస్తే.. పొంగులేటి శ్రీనివాసరెడ్డి.. కేఆర్ సురేశ్ రెడ్డి..నాయిని నర్సింహారెడ్డి.. సిరికొండ మధుసూదనాచారి పేర్లు వినిపిస్తున్నాయి. ప్రతి ఒక్క పేరు వెనుక కారణం చెబుతున్నా.. ఎవరికి దక్కుతుందన్న క్లారిటీ లేని పరిస్థితి. ఒక బెర్తు కన్ఫర్మ్ కాగా.. మరొకటి మాత్రం ప్రస్తుతానికి వేకెంట్ పొజిషన్ లో ఉందన్న అభిప్రాయం వ్యక్తమవుతోంది.

 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English