రామ్ బాబూ.. ఇంత అతి అవసరమా?

రామ్ బాబూ.. ఇంత అతి అవసరమా?

పూరి జగన్నాథ్ సినిమాలంటేనే ప్రత్యేకం. వాటిలో హీరో తీరే వేరుగా ఉంటుంది. విపరీతమైన యాటిట్యూడ్ ఉండేలా ఆ క్యారెక్టర్లను తీర్చిదిద్దుతాడు పూరి. వరుసగా ఫ్లాపులు ఎదురైనా.. రొటీన్ అన్న విమర్శలు వచ్చినా పూరి స్టయిల్ మాత్రం మారలేదు. అతడి కొత్త సినిమా ‘ఇస్మార్ట్ శంకర్’ కూడా ఇలాగే ఉండేలా ఉంది. ఇందులో మహా తిక్క క్యారెక్టర్ చేస్తున్నట్లున్నాడు. ఐతే సినిమాలో ఎలా ప్రవర్తించినా ఓకే కానీ.. పాత్ర తాలూకు యాటిట్యూడ్‌ను తలకెక్కించుకుని బయట కూడా తేడాగా ప్రవర్తిస్తేనే ఇబ్బంది. రామ్ తీరు చూస్తే అలాగే ఉంది. ‘ఇస్మార్ట్ శంకర్’ చేస్తున్నప్పటి నుంచి ట్విట్టర్లో రామ్ తీరు వేరుగా ఉంటోంది. ఎన్నడూ లేనంత అగ్రెసివ్‌నెస్ కనిపిస్తోంది. కొన్ని తిక్క తిక్క ట్వీట్లు వేస్తున్నాడు. ఐతే ఇప్పుడు ఒక సీరియస్ ఇష్యూ మీద అతను స్పందించిన తీరు వివాదాస్పదమవుతోంది.

తెలంగాణలో ఇంటర్మీడియట్ బోర్డు నిర్వాకంతో 15 మందికి పైగా విద్యార్థులు ఆత్మహత్యలకు పాల్పడటం కలకలం రేపుతున్న సంగతి తెలిసిందే. దీనిపై సెలబ్రెటీలు ఒక్కొక్కరిగా స్పందిస్తున్నారు. వారిలో ఎవ్వరూ కూడా ప్రభుత్వాన్ని, ఇంటర్మీడియట్ బోర్డును పల్లెత్తు మాట అనుకుండా విద్యార్థులకు హితవు పలికే ప్రయత్నం చేస్తున్నారు. రామ్ కూడా అదే చేశాడు కానీ.. అతడి ట్వీట్లో ‘అతి’ ఎక్కువైంది. ‘‘ఇంటర్ రిజల్ట్స్‌యే జీవితం అనుకునే నా తమ్ముళ్లకి, చెల్లెళ్లకి.. మీరు జీవితంలో అవ్వబోయేదానికి, చెయ్యబోయే దానికి ఇది ఒక ఆ--తో సమానం. దయచేసి లైట్ తీసుకోండి. ఇట్లు ఇంటర్ కూడా పూర్తి చేయని మీ రా.పో’’ అని ట్వీటాడు రామ్. ఇందులో రామ్ మధ్యలో మ్యూట్ చేసిన పదం ఏంటో విడమరిచి చెప్పాల్సిన పని లేదు. సీరియస్ ఇష్యూలో ఇలాంటి బూతు పదం వాడి ఏం సంకేతాలు ఇవ్వదలుచుకున్నాడో ఏమో రామ్ బాబు. ఈ ట్వీట్ ‘ఇస్మార్ట్ శంకర్’ హ్యాంగోవర్లో ఉండి చేసినట్లుగా అనిపిస్తోంది. ఇక ‘ఇంటర్ కూడా పూర్తి చేయని’ అనే మాట విషయానికి వస్తే.. అందరికీ రామ్ లాగా ఫిలిం బ్యాగ్రౌండ్ ఉండదు. హీరో ఛాన్సులు రావు. కోట్లు పెట్టి సినిమాలు తీసే పెదనాన్న ఉండడు. అదే ఉంటే.. ఇంటర్ ఏంటి, టెన్త్ కూడా పూర్తి చేయకుండా సినిమాల్లోకి వచ్చేయొచ్చు. సామాన్యుల పిల్లలకు చదువు కీలకం. చదువల పేరుతో ఒత్తిడి పెంచడం కరెక్ట్ అని ఎవ్వరూ అనరు కానీ.. మన ఫిలిం సెలబ్రెటీల్లాగా సామాన్యుల పిల్లలు చదువును తేలిగ్గా అయితే తీసుకోలేరు కదా?

 

రాజకీయ వార్తలు

 

సినిమా వార్తలు

 
Home
వార్తలు
ఫోటో గ్యాలరీ
English