ఇంట్లో వాళ్ల కంటే దీప్తికే ఎక్కువ భయపడతాడట

వారం మొత్తం ఒకలా.. వారం చివర్లో ఎవరో ఒకరు ఎలిమినేట్ అవుతూ.. ఈ ప్రోగ్రాం మీద మరింత ఆసక్తిని పెంచేలా చేస్తోంది బిగ్ బాస్ తెలుగు వెర్షన్. ఆదివారం ముగిసిన ఎపిసోడ్ తో బిగ్ బాస్ తాజా సీజన్ లో యాభై రోజులు ఇట్టే గడిచిపోయాయి. తాజా ఎపిసోడ్ లో ప్రియను షాకింగ్ రీతిలో తొలగించటం అందరిని ఆశ్చర్యానికి గురి చేయటమే కాదు.. తీవ్రమైన భావద్వేగాన్ని మిగిల్చింది. ఈ వారం ఎలిమినేట్ అయ్యేదెవరన్న విషయాన్ని చెప్పకుండా.. ప్రియ.. యానీ మాస్టర్ ఇద్దరిని బాక్సులో ఉంచేయటం.. ఇంటి సభ్యుల్లో టెన్షన్ పుట్టించేలా చేశారు.

నిజానికి ఇంటి సభ్యులు , ఈ రియాల్టీ షోను చూస్తున్న వారు సైతం థ్రిల్ కు గురయ్యారు. అదే సమయంలో ఇంటిని వీడిపోతున్న వారి గురించి తలుచుకుంటూ పెద్ద ఎత్తున భావోద్వేగానికి గురి కావటం.. ఏడ్చేయటం ఈ మధ్యన ఎక్కువైంది. తాజాగా ఎలిమినేట్ అయిన ప్రియకు బయటకు వెళ్లే వేళలో ఒక ఆసక్తికరమైన టాస్క్ ఇచ్చారు.

అందులో ఇంట్లో ఉన్న సభ్యులకు మార్కులు ఇవ్వాలని కోరితే.. తనకు బాగా దగ్గరైన ప్రియాంకకు మాత్రం పదికి వంద మార్కులు వేయగా.. యానీ మాస్టర్ కు పదికి పది మార్కులు వేశారు. విశ్వకు ఐదు మార్కులకే పరిమితం చేసింది.ఇలా మార్కులు ఇచ్చే క్రమంలో షణ్ముఖ్కు 8.5 మార్కులు ఇచ్చారు. ఈ సందర్భంగా షణ్ణు గురించి మాట్లాడుతూ.. ‘నీ గర్ల్ ఫ్రెండ్ దీప్తికి ఏమైనా చెప్పాలా? అని అడగ్గా.. ‘ఈ మాట చాలు’ అంటూ షణ్ముఖ్ సమాధానం ఇచ్చాడు.

ఈ క్రమంలో ప్రియ కలుగజేసుకొని.. నిన్ని మర్చిపోయి బిగ్ బాస్ హౌస్ లో హాయిగా ఉన్నాడని తాను చెబుతానని ప్రియా చెప్పటంతో వణికిపోయాడు షణ్ముఖ్. వెంటనే విచిత్రమైన ఎక్స్ ప్రెషన్ ఇస్తూ.. తనకు అలా చెప్పొద్దని దండం పెట్టాడు. అంతేకాదు.. దీప్తికి తాను ఎక్కువగా భయపడతానని.. ఇంట్లో వారంటే కూడా భయం లేదని.. దీప్తి అంటే మాత్రం తనకు భయమని చెప్పాడు. దీంతో.. షణ్ముఖ్ మాట ఆసక్తికరంగా మారాయి. బిగ్ బాస్ హౌస్ లో షణ్ముఖ్ గురించి మాట్లాడిన ప్రియా.. అతనో వండర్ ఫుల్ పర్సన్ అని.. అతను బ్రెయిన్ తో గేమ్ ఆడుతున్నట్లుగా మెచ్చుకున్నారు. ఇలాంటి ఫ్రెండ్ ప్రతి ఒక్కరికి ఉండాలని షణ్ణును పొగిడేశారు.