పెంచి పోషించిన గ్రోకే దెబ్బేసిందిగా మస్క్

భారత్‌లో స్టార్‌లింక్ సేవలు ప్రారంభించేందుకు ఎలాన్ మస్క్ ప్రయత్నిస్తున్న విషయం తెలిసిందే. అయితే మస్క్ సొంత AI చాట్‌బాట్ గ్రోక్ మాత్రం అదే స్టార్‌లింక్ వల్ల భారత్‌కు ఎదురయ్యే సమస్యలను వివరించింది. స్టార్‌లింక్‌ను భారత్‌లో అనుమతిస్తే నష్టాలేంటని ఓ నెటిజన్ అడిగిన ప్రశ్నకు నాలుగు కారణాలు చెప్పింది. అందులో దేశ భద్రత నుంచి ఇంటర్నెట్ ఖర్చుల వరకు పలు అంశాలను ప్రస్తావించింది. ఈ సమాధానం సోషల్ మీడియాలో వైరల్ అవుతోంది.

గ్రోక్ మొదట దేశ భద్రత గురించి చెప్పింది. స్టార్‌లింక్ విదేశీ కంపెనీ ఆధీనంలో పనిచేస్తుంది. దీంతో సరిహద్దు ప్రాంతాల్లో అవసరమైనప్పుడు ఇంటర్నెట్ సేవలను నిలిపివేయడం భారత్‌కు కష్టమవుతుందని పేర్కొంది. అత్యవసర పరిస్థితుల్లో కూడా సమస్యలు రావచ్చని తెలిపింది. గతంలో ఉగ్రవాదులు, స్మగ్లర్ల దగ్గర స్టార్‌లింక్ పరికరాలు దొరికినట్లు వచ్చిన వార్తలను కూడా ప్రస్తావించింది.

రెండో కారణంగా భారతీయుల ఇంటర్నెట్ సమాచారానికి సంబంధించిన సమస్యలను వివరించింది. స్టార్‌లింక్ శాటిలైట్ల మధ్య లేజర్ సాంకేతికత ద్వారా సమాచారం పంపించే అవకాశం ఉంది. దీనివల్ల కొంత సమాచారం భారత్‌లోని కేంద్రాల ద్వారా కాకుండా విదేశాల మీదుగా వెళ్లొచ్చని చెప్పింది. అలాంటప్పుడు అవసరమైన సమాచారాన్ని భారత అధికారులు పరిశీలించడం కష్టమవుతుందని గ్రోక్ పేర్కొంది.

మూడో కారణం ఇంటర్నెట్ ఖర్చు. ప్రస్తుతం జియో, ఎయిర్‌టెల్ అందిస్తున్న సేవలతో పోలిస్తే స్టార్‌లింక్ పరికరాల ధర, నెలవారీ ఛార్జీలు ఎక్కువగా ఉండొచ్చని తెలిపింది. ముఖ్యంగా గ్రామీణ ప్రాంతాల్లోని ప్రజలకు ఈ ఖర్చు భారమవుతుందని చెప్పింది. నాలుగో కారణంగా భారత టెలికాం కంపెనీల వ్యాపారంపై ప్రభావాన్ని ప్రస్తావించింది. స్థానిక కంపెనీలకు పోటీ పెరగడంతో పాటు అమెరికాకు చెందిన ఒకే సంస్థపై ఎక్కువగా ఆధారపడే పరిస్థితి రావచ్చని వివరించింది.

ఇదంతా జరుగుతున్న సమయంలోనే భారత్‌లో కొందరు సంపన్న వ్యాపారవేత్తలు స్టార్‌లింక్‌ను అడ్డుకుంటున్నారని మస్క్ ఆరోపించారు. అంబానీయే ఇండియాకు అసలు బాసా? అని కూడా ప్రశ్నించారు. దీనిపై కేంద్రం స్పందిస్తూ అన్ని శాటిలైట్ ఇంటర్నెట్ కంపెనీలకు ఒకే నిబంధనలు వర్తిస్తాయని తెలిపింది. మరోవైపు మస్క్ సొంత AI ఇచ్చిన సమాధానాన్ని నెటిజన్లు షేర్ చేస్తున్నారు.