రెండు భాగాల ఆలోచ‌నే కొంప ముంచిందా?

ఈ శుక్ర‌వారం విడుద‌లై నెగెటివ్ టాక్ తెచ్చుకున్న భార‌తీయుడు-2 సినిమాకు అతి పెద్ద స‌మ‌స్య నిడివే అన్న‌ది ఇప్పుడు ప్ర‌ధానంగా వినిపిస్తున్న కంప్లైంట్. స‌న్నివేశాలు మ‌రీ సాగ‌తీత‌గా ఉన్నాయ‌ని.. శంక‌ర్ సినిమాల్లో ఎప్పుడూ ఇంత సాగ‌తీత లేద‌ని.. స‌న్నివేశాలు ఇంత‌గా విసిగించ‌లేద‌ని ప్రేక్ష‌కులు అభిప్రాయ‌ప‌డుతున్నారు.

ఐతే ఆ సాగ‌తీత ఎందుకు వ‌చ్చింది అన్న‌ది ఇప్పుడు చ‌ర్చ‌నీయాంశం. నిజానికి భార‌తీయుడు-2ను రెండు సినిమాలుగా తీసే ఉద్దేశం మొద‌ట లేదు. ఒక సినిమాగానే మొద‌లుపెట్టారు. కానీ మ‌ధ్య‌లో రెండు పార్ట్స్ అయింది. ఇందుకు క‌థ విస్తృతి మాత్ర‌మే కార‌ణం అని భావించ‌లేం.

ఈ సినిమా షూట్ క్రేన్ ప్ర‌మాదం వ‌ల్ల మ‌ధ్య‌లో ఆగింది. రెండేళ్లు మ‌ళ్లీ సినిమా పునఃప్రారంభం కాలేదు. మామూలుగానే శంక‌ర్ సినిమాల‌కు బ‌డ్జెట్లు పెరుగుతాయి. ఈ బ్రేక్ వ‌ల్ల బడ్జెట్ మ‌రింత‌గా త‌డిసి మోపెడైంది. ఈ క్ర‌మంలోనే బ‌డ్జెట్ వ‌ర్క‌వుట్ చేయ‌డానికి 2 పార్ట్స్ ఆలోచ‌న చేసిన‌ట్లున్నాడు శంక‌ర్. దీంతో క‌థ‌ను విస్త‌రించ‌డానికి చూశాడు. ఈ క్ర‌మంలో ఇంట‌ర్వెల్ ప‌డాల్సిన చోట ఇండియ‌న్-2ను ముగించాల‌ని నిర్ణ‌యించుకున్నాడు.

దీంతో అప్ప‌టిదాకా ప్ర‌థ‌మార్ధం అనుకున్న దాన్ని పూర్తి సినిమా చేయ‌డంతో అద‌న‌పు సీన్లు జోడించ‌డంతో పాటు ఉన్న స‌న్నివేశాల‌ను సాగ‌దీశార‌న్న‌ది స్ప‌ష్టం. దీని వ‌ల్ల ఆ స‌న్నివేశాల్లో బిగి పోయింది. భార‌తీయుడు-2 చూస్తే పెద్ద‌గా క‌థ చెప్పిన ఫీలింగే క‌ల‌గ‌లేదు. అన‌వ‌స‌ర సీన్లు ప్రేక్ష‌కుల‌ను విసిగించేశాయి. చాలా సీన్ల‌లో డైలాగులు ఎక్కువైపోయాయి. షార్ప్‌నెస్ కొర‌వ‌డింది. ఇదే ఇప్ప‌డు సినిమాకు పెద్ద ప్ర‌తిబంధ‌కంగా మారింది.

అంద‌రూ సినిమా ల్యాగ్ ల్యాగ్ అంటున్నారు. భార‌తీయుడు-3 ట్రైల‌ర్ చూస్తే కొన్ని ఎగ్జైటింగ్ విష‌యాలున్న‌ట్లే క‌నిపిస్తోంది కానీ.. పార్ట్-2 చూశాక దాని కోసం ప్రేక్ష‌కులు ఏమాత్రం ఆస‌క్తి ప్ర‌ద‌ర్శిస్తార‌న్న‌దే ప్ర‌శ్నార్థ‌కంగా మారింది. మొత్తంగా చూస్తే ఈ సినిమాను రెండు భాగాలుగా చేయాల‌న్న ఆలోచ‌నే బెడిసికొట్టిన‌ట్లు అనిపిస్తోంది.