అకీరా నో అంటే ఫ్యాన్స్ ఊరుకుంటారా?

కొంచెం స్టార్ ఇమేజ్ తెచ్చుకున్న హీరోకు కొడుకు పుట్టాడంటే చాలు.. ఆ పిల్లాడు కూడా హీరోనే అని ఫిక్స్ అయిపోతారు అభిమానులు. హీరోల అల్లుళ్లు, దూరపు చుట్టాలు కూడా హీరోలు అయిపోతున్న ఈ రోజుల్లో ఇక స్టార్ హీరోల కొడుకులు హీరోలు కాకుండా ఎలా ఉంటారు. అందులోనూ పవర్ స్టార్ పవన్ కళ్యాణ్ లాంటి అల్టిమేట్ క్రేజ్ ఉన్న స్టార్ హీరో కొడుకు మీద అభిమానుల్లో ఏ స్థాయిలో అంచనాలుంటాయో తెలిసిందే.

పవన్, రేణు దేశాయ్‌ల తనయుడైన అకీరా నందన్ టీనేజీలో ఉండగానే మాంచి ఫాలోయింగ్ సంపాదించేశాడు. అతను ఎప్పుడైనా బయట మీడియా కళ్లలో పడ్డాడంటే చాలు.. సోషల్ మీడియాలో ఆ ఫొటోలు వైరల్ అయిపోతాయి. అకీరా బర్త్‌డే అంటే స్టార్ హీరోల రేంజిలో అతడి పేరు ట్రెండ్ అవుతూ ఉంటుంది. ఈ స్థాయిలో క్రేజ్ తెచ్చుకున్న కుర్రాడు.. నటనలోకి రాడు అంటే అభిమానులు ఊరుకుంటారా అన్నది ప్రశ్న.

ఇప్పుడీ ప్రశ్న ఎందుకొచ్చింది అంటే.. ‘టైగర్ నాగేశ్వరరావు’ చిత్రంలో ఓ కీలక పాత్ర చేసిన రేణు దేశాయ్, దాని గురించి మీడియా‌తో మాట్లాడుతూ.. అకీరా గురించి ఎదురైన ప్రశ్నలకు సమాధానం చెప్పింది. అకీరాకు నటన మీద ఆసక్తి లేదని.. అతను డైరెక్షన్, సంగీతం లాంటి వాటి మీద ఫోకస్ చేస్తున్నాడని చెప్పింది. తాను కూడా అకీరా నటుడు కావాలని అనుకోవట్లేదని చెప్పింది. తాను కానీ, పవన్ కళ్యాణ్ కానీ అతణ్ని నటనలోకి రావాలని ఫోర్స్ చేయట్లేదని కూడా రేణు దేశాయ్ చెప్పడం గమనార్హం. ఈ మాటలు పవన్ అభిమానులకు రుచించలేదు.

అతను కాబోయే స్టార్ హీరో అని వాళ్లు ఎప్పుడో ఫిక్స్ అయిపోయారు. అతడి అరంగేట్రం గురించి కొన్నేళ్ల ముందు నుంచే చర్చలు సాగిస్తున్నారు. నిజంగా అకీరా నటన వద్దని డైరెక్షనో ఇంకొకటో చేసుకుంటే వాళ్లు ఊరుకుంటారా అని డౌట్. ఐతే రేణు ఇప్పుడు ఇలా అన్నా కూడా మున్ముందు ఆలోచన మారకుండా ఉండదు. చాలామంది వారసుల విషయంలో వాళ్ల తల్లిదండ్రులు ముందు ఇలాగే మాట్లాడినా.. తర్వాత హీరోగా పరిచయం చేశారు. కాబట్టి అకీరా టైం వచ్చే వరకు ఎదురు చూడాలి తప్ప ఫ్యాన్స్ మరీ కంగారు పడాల్సిన పని లేదు.