ఖుషి కథకి స్ఫూర్తి మణిరత్నమా

విజయ్ దేవరకొండ-సమంతా మొదటి కలయికలో రూపొందుతున్న ఖుషి సెప్టెంబర్ 1 విడుదలకు రంగం సిద్ధం చేసుకుంటోంది. లైగర్ డిజాస్టర్ తర్వాత ఓవర్ అగ్రెసివ్ హీరోయిజంకి సెలవు చెప్పేసి విభిన్న కథలను ఎంచుకునే ప్రయత్నంలో రౌడీ హీరోకి మరోసారి ఫ్యామిలీ, యూత్ ఆడియన్స్ ని దగ్గర చేసే ఛాన్స్ ఖుషి ఇచ్చేలా ఉంది. మైత్రి మూవీ మేకర్స్ బ్యానర్ పై రూపొందిన ఈ ఎమోషనల్ లవ్ ఎంటర్ టైనర్ మీద దర్శకుడు శివ నిర్వాణ చాలా కష్టపడుతున్నాడు. టక్ జగదీష్ ఫలితం గురించి వచ్చిన నెగటివ్ కామెంట్స్ కి దీంతోనే సమాధానం చెప్పాలి.

ఇక ఖుషి కథకు సంబంధించిన కొన్ని లీకులు ఆసక్తికరంగా ఉన్నాయి. ఇదో హిందూ అబ్బాయి, ముస్లిం అమ్మాయి ప్రేమ కథఏ హింట్ ఫస్ట్ లిరికల్ వీడియోలో ఇంతకు ముందే ఇచ్చారు. నిన్న వదిలిన ఆరాధ్య సాంగ్ లో ఇద్దరూ కలిసి ఒకే ఆఫీస్ లో పని చేసినట్టు చూపించారు. అంటే మణిరత్నం దిల్ సేలో మనిషా కొయిరాలా పాత్ర ఛాయల్లో సమంతా పాత్రని డిజైన్ చేసి ఉండొచ్చనే మాటని పూర్తిగా కొట్టి పారేయలేం. మరో ట్విస్టు కూడా చెబుతున్నారు. ఒక సామ్ దూరమయ్యాక అదే పోలికలతో ఉన్న మరో సామ్ ని కాశ్మీర్ లో చూసిన హీరో మళ్ళీ ప్రేమలో పడటమనే పాయింట్ కూడా ఉండొచ్చట.

రెండూ నిజమో కాదో చెప్పలేం కానీ అభిమానుల మధ్య మాత్రం ఆసక్తికరమైన చర్చకు దారి తీసేలా ఉంది. శివ నిర్వాణ మీద నిజంగానే మణిరత్నం ప్రభావం ఉంటుంది. మజిలీని మౌన రాగం నుంచే స్ఫూర్తి చెంది రాసుకోవడం అబద్దం కాదు. కాకపోతే అందులో మోహన్, కార్తీక్ లను కలిపి నాగచైతన్య పాత్రగా మార్చాడు. నిన్ను కోరిలో సైతం అలాంటి పొయెటిక్ టచ్ ఉంటుంది. సో ఖుషిలోనూ ఆ ప్రభావం ఖచ్చితంగా ఉంటుంది. నా రోజా నువ్వే నా అంజలి నువ్వేలో మణిరత్నం టైటిల్స్ అన్నీ వాడేశాడు. కాబట్టి పైన క్లూస్ ని అంత తేలిగ్గా తీసుకోవడానికి మాత్రం లేదు.