పంట పండింది.. బ్యాక్ టు బ్యాక్ బ్లాక్‌బస్టర్స్

పీపుల్స్ మీడియా ఫ్యాక్టరీ.. టాలీవుడ్లో కొన్నేళ్ల నుంచి చురుగ్గా సినిమాలు నిర్మిస్తున్న సంస్థ. సినిమాల ఎంపికలో మంచి అభిరుచినే చూపిస్తున్నప్పటికీ.. ఆ సంస్థకు ఒక దశ వరకు భారీ విజయాలు దక్కలేదు. గూఢచారి, ఓ బేబీ లాంటి హిట్లు ఉన్నప్పటికీ.. తేడా కొట్టిన సినిమాల లిస్టు పెద్దదే. ఒక దశ వరకు చిన్న పెట్టుబడులు పెడుతూ.. వేరే సంస్థ భాగస్వామ్యంలో సినిమాలు నిర్మిస్తూ వచ్చిన ఈ సంస్థ.. ఈ మధ్య జోరు పెంచింది. కొంచెం పెద్ద స్థాయిలో సోలోగా సినిమాలు ప్రొడ్యూస్ చేస్తోంది. వాళ్లు చేస్తున్న సాహసాలకు మంచి ఫలితాలే దక్కుతున్నాయి.

ముఖ్యంగా 2022వ సంవత్సరం పీపుల్స్ మీడియా బేనర్‌కు మరపు రానిదే. పాన్ ఇండియా స్థాయిలో బ్లాక్‌బస్టర్ అయిన ‘కార్తికేయ-2’తో ఆ సంస్థ పేరు మార్మోగింది. ఇప్పటిదాకా ఆ సంస్థలో వచ్చిన ఫెయిల్యూర్ సినిమాల నష్టాలన్నింటినీ ఈ ఒక్క చిత్రం కవర్ చేసేసిందంటే అతిశయోక్తి కాదు.

అంత పెద్ద బ్లాక్ బస్టర్ తర్వాత పీపుల్స్ మీడియా నుంచి తాజాగా ‘Dhamaka’ సినిమా వచ్చింది. ఈ సినిమాకు విడుదల ముంగిట పెద్దగా హైప్ కనిపించలేదు. టాక్ కూడా కొంచెం అటు ఇటుగానే వచ్చింది. కానీ ఈ ప్రభావం ఏమీ సినిమా పెర్ఫామెన్స్ మీద ప్రభావం చూపలేదు. తొలి రోజు నుంచి వసూళ్ల మోత మోగిస్తూ సాగుతున్న ఈ చిత్రం నాలుగు రోజుల్లోనే 30 కోట్ల దాకా గ్రాస్ కలెక్ట్ చేసింది. బయ్యర్లందరూ సేఫ్ జోన్‌కు దగ్గరగా ఉన్నారు. ఈ వీకెండ్లో చెప్పుకోదగ్గ సినిమాలేవీ లేవు కాబట్టి రెండో వారంలోనూ ‘ధమాకా’ జోరు కొనసాగించడం ఖాయం.

సినిమా మంచి లాభాలు అందుకుని బ్లాక్ బస్టర్ రేంజ్ అందుకున్నా ఆశ్చర్యం లేదు. ఐదు నెలల వ్యవధిలో రెండు బ్లాక్‌బస్టర్లు కొట్టడం అంటే ఏ సంస్థకైనా పెద్ద విషయమే. ఈ ఊపులో Pawan kalyanతో అనుకుంటున్న సినిమా కనుక ఓకే అయితే పీపుల్స్ మీడియా వారి పంట పండినట్లే.