అభిమాని కుమార్తె పెళ్లికి బాలయ్య

కొందరు ప్రముఖులు తమ తీరుతో సామాన్యుల మనసుల్ని గెలుచుకుంటారు. తాజాగా అలాంటి పనే చేశారు సీనియర్ నటుడు.. హిందూపురం ఎమ్మెల్యే నందమూరి బాలకృష్ణ. తాజాగా తన అభిమాని ఇంట్లో జరిగిన పెళ్లికి హాజరై సందడి చేశారు. తమను అభిమానించే వారిని ప్రత్యేకంగా గుర్తుంచుకొని మరీ వారింట్లో జరిగే వేడుకలకు హాజరయ్యే ప్రముఖులు కొద్దిమందే ఉంటారు. అలాంటి వారిలో తాను ఒకడినన్న విషయాన్ని తన చేతలతో చేసి చూపించారు బాలయ్య.

అనంతపురం జిల్లా బాలయ్య అభిమాన సంఘానికి అధ్యక్షుడిగా వ్యవహరిస్తుంటారు గౌస్ మొహిద్దిన్. ఆయన కుమార్తె పెళ్లికి బాలక్రిష్ణ ప్రత్యేకంగా హాజరయ్యారు. ఆయన రాకతో పెళ్లింట సందడి వాతావరణం నెలకొంది. పెళ్లి జరిగే వేదిక వద్దకు వచ్చిన బాలయ్య.. సంప్రదాయ టోపీని ధరించి పెళ్లికొడుకును ఆశీర్వదించారు. అంతేకాదు.. తన అభిమాని తల్లి వద్దకు వెళ్లి ఆమెను పలుకరించడంతో ఆమె ఆనందానికి హద్దులు లేకుండా పోయింది.

అనంతరం తన అభిమాని కుమార్తె కమ్ పెళ్లికూతురు వద్దకు వెళ్లి.. సంప్రదాయ పద్దతిలో ఆమెకు గంధం పూసి ఆశీర్వదించారు. అభిమాని పెళ్లికి వెళ్లటమంటే.. అలా వెళ్లామా? కనిపించామా.. తిరిగి వెళ్లిపోయామా? అన్నట్లు కాకుండా ఇంట్లో ఒక వ్యక్తిగా బాలయ్య వ్యవహరించిన తీరు అందరిని ఆకట్టుకోవటమే కాదు.. మనసును దోచేసింది. పెళ్లికి వచ్చిన బాలయ్య కారణంగా ఆయన్ను అమితంగా అభిమానించే అభిమాని ఆనందంతో ఉక్కిరిబిక్కిరి అయ్యారు. తాము ఆరాధించే ప్రముఖులు.. తమ ఇంట్లో జరిగే వేడుకులకు హాజరైతే ఆ సీనే వేరుంటుందన్నది మరోసారి రిపీట్ అయ్యిందని చెప్పక తప్పదు.