దేవరకొండ తమ్ముడి రొటీన్ హైవే

కేవలం విజయ్ దేవరకొండ తమ్ముడనే బ్రాండ్ తో ఇండస్ట్రీలో అవకాశాలు పట్టేస్తున్న ఆనంద్ దేవరకొండకు ఇంకా బలమైన థియేట్రికల్ మార్కెట్ ఏర్పడలేదు. అందుకే మిడిల్ క్లాస్ మెలోడీస్ ని ఓటిటికి ఇచ్చాక పుష్పక విమానంని హాళ్లలో వదిలితే ఆశించిన ఫలితం రాలేదు.తాజాగా హైవేని తిరిగి డిజిటల్ బాట పట్టించారు. 118, డబ్ల్యుడబ్ల్యుడబ్ల్యులతో దర్శకుడిగా మారిన సినిమాటోగ్రాఫర్ కెవి గుహన్ మూడో మూవీ ఇది. ట్రైలర్ కొంత ఆసక్తి రేపగా ప్రీ రిలీజ్ ఈవెంట్ ని గట్టిగానే చేశారు. అంతో ఇంతో ప్రేక్షకుల్లో అంచనాలు లేకపోలేదు.

టైటిల్ హైవే అని పెట్టారు కానీ దానికి తగ్గ స్పీడ్ సినిమాలో లేకపోయింది. అనగనగా ఒక సైకో కిల్లర్. వయసులో ఉన్న అమ్మాయిలను కిడ్నాప్ చేసి నిర్మానుష ప్రదేశాలకు తీసుకెళ్లి దారుణంగా చంపేస్తూ ఉంటాడు. పోలీసులు ఎంత జుత్తు పీకున్నా వాడి ఆచూకీ దొరకదు. హీరోకేమో ఫోటోగ్రఫీ ప్యాషన్. ఓ జర్నీలో అమాయకురాలైన హీరోయిన్ ని చూసి మనసు పారేసుకుంటాడు. కట్ చేస్తే ఆమెను సైకో ఎత్తుకుపోతాడు. వాడి జాడను పట్టుకుని చివరికి ఎలా మట్టుబెట్టాడు, ప్రియురాలిని ఎలా విడిపించుకున్నాడనేదే స్టోరీ.

రాక్షసుడి తాలూకు ప్రభావమో లేక జనాలు ఓటిటిలో థ్రిల్లర్ లు చూడటం లేదన్న అభిప్రాయమో ఏమో కానీ కెవి గుహన్ ఎలాంటి ప్రత్యేకత లేని ఓ రొటీన్ సైకో సబ్జెక్టుని తీసుకుని నిరాశపరిచారు. హిందీ మలయాళంతో పాటు తెలుగులోనూ ఇలాంటివి బోలెడు వచ్చాయి. ఇంతోటి దానికి నిర్మాతలు ఎలా ఎగ్జైట్ అయ్యారో అర్థం కాదు. టెక్నికల్  వాల్యూస్ ఉన్నప్పటికీ కంటెంట్ వీక్ గా ఉండటంతో హైవే మీద ప్రయాణం బోల్తా పడింది. ఓటిటి కాబట్టి సరిపోయింది కానీ లేదంటే పరిస్థితి ఎలా ఉండేదో ఊహించుకోవడం కష్టమే.