కొత్త ‘హీరో’ పనికొస్తాడా?

టాలీవుడ్లోకి మరో యంగ్ హీరో అడుగు పెడుతున్నాడు. ఆ కుర్రాడి పేరు.. గల్లా అశోక్. టీడీపీ ఎంపీ, వ్యాపారవేత్త గల్లా జయదేవ్ కొడుకితను. మహేష్ బాబుకు మేనల్లుడు అవుతాడు. గత ఏడాదే అశోక్ తెరంగేట్రం గురించి ప్రకటించారు. సినిమాను మొదలుపెట్టారు. ఐతే కరోనా కారణంగా ఆ సినిమా అనుకున్న స్థాయిలో ముందుకు కదల్లేకపోయింది. త్వరలోనే సినిమాను పూర్తి చేసి ప్రేక్షకుల ముందుకు తేవాలనుకుంటున్నారు. ఈ క్రమంలోనే ఈ చిత్ర టైటిల్‌ను ప్రకటిస్తూ టీజర్ వదిలారు.

ఈ సినిమాకు ‘హీరో’ అనే టైటిల్ ఖరారు చేశారు. మెగాస్టార్ చిరంజీవి సూపర్ హిట్ సినిమాల టైటిళ్లను ఈ మధ్య యంగ్ హీరోలు బాగా వాడేసుకుంటున్న సంగతి తెలిసిందే. చిరు సినిమా టైటిల్ అయిన ‘హీరో’ను ఇంతకుముందే నితిన్ వాడుకోగా.. ఆ సినిమా డిజాస్టర్ అయింది. ఇప్పుడు అశోక్ చిత్రానికి ‘హీరో’ అని పెట్టుకున్నారు.

కొంచెం బ్యాగ్రౌండ్ ఉన్న ఫ్యామిలీ నుంచి వచ్చే హీరో తొలి సినిమా అన్నాక ఫోకస్ అంతా లుక్స్, స్క్రీన్ ప్రెజెన్స్, డైలాగ్ డెలివరీ, హావభావాలు ఎలా ఉన్నాయనే అందరూ చూస్తారు. ప్రోమోల్లో కూడా ఫోకస్ అదే ఉంటుంది. ‘హీరో’ విషయానికి వస్తే దీని కథేంటన్నది టీజర్లో పెద్దగా రివీల్ చేయలేదు. కొన్ని ఆసక్తికర షాట్స్ తీసుకుని అలా అలా చూపిస్తూ వెళ్లారు. ఫోకస్ అంతా అశోక్ మీదే నిలిచింది. ‘జోకర్’ సినిమాలో హీరో తరహా లుక్‌లో కనిపిస్తూ అదే మాదిరి హావభావాలు ఇచ్చే చోట అశోక్ ఆకట్టుకున్నాడు. టీజర్లో ఎక్కువ ఆసక్తి రేకెత్తించిన విషయం ఇదే. కథ కూడా దీని చుట్టూ ఏమైనా తిరుగుతుందేమో తెలియదు. కానీ టీజర్లో మాత్రం సంబంధిత షాట్లు హైలైట్ అయ్యాయి. పక్కా కమర్షియల్ ఎంటర్టైనర్‌ లాగే ‘హీరో’ను తీర్చిదిద్దే ప్రయత్నం జరిగినట్లుంది. టీజర్ వరకు అయితే అశోక్‌కు పాస్ మార్కులు పడతాయి.