ఐకాన్ ఎప్పుడో నాకూ తెలియదు

ఐకాన్.. ఎప్పుడో మూడేళ్ల ముందు తెరపైకి వచ్చిన సినిమా. అల్లు అర్జున్ ‘నా పేరు సూర్య’ సినిమా చేస్తున్న సమయంలో ఈ చిత్రం గురించి అనౌన్స్‌మెంట్ వచ్చింది. ‘ఎంసీఏ’తో హిట్టు కొట్టిన ఊపులో ఉన్న వేణు శ్రీరామ్‌తో ఈ సినిమాకు కమిట్మెంట్ ఇచ్చాడు బన్నీ. నేరుగా టైటిల్‌తో ఒక పోస్టర్ వదలడంతో బన్నీ తర్వాతి సినిమా ఇదే అనుకున్నారంతా. కానీ దీన్ని కాకుండా ‘అల వైకుంఠపురములో’ను మొదలుపెట్టాడు స్టైలిష్ స్టార్. ఆ తర్వాత ‘పుష్ప’ లైన్లోకి వచ్చింది. ఇది పూర్తయ్యాక కొరటాల శివ సినిమా ఉంది. ఆపై ప్రశాంత్ నీల్ అంటున్నారు.

మరి ‘ఐకాన్’ సంగతేంటన్నదే అర్థం కావడం లేదు. ఈ సినిమా అటకెక్కేసిందా అంటే అలాంటిదేమీ లేదన్న సంకేతాలే వస్తున్నాయి. బన్నీ మిత్రుడు వాసు సైతం ఈ ప్రాజెక్టు ఉంటుందని.. తనకు కుదిరిన సమయంలో ఈ చిత్రం చేస్తాడని అన్నాడు. ఐతే బన్నీకి కుదిరేది ఎప్పుడన్నదే తెలియడం లేదు.

‘వకీల్ సాబ్’ ప్రమోషన్లలో భాగంగా మీడియాను కలిసిన వేణు శ్రీరామ్‌కు అనుకున్నట్లే మీడియా నుంచి ‘ఐకాన్’ గురించి ప్రశ్న ఎదురైంది. ఈ సినిమా ఆగిపోలేదని మాత్రం వేణు స్పష్టం చేశాడు. కానీ ఆ సినిమా ఎప్పుడో మొదలవుతుందో తనకు కూడా తెలియదని అనేశాడు. అంతకుమించి ఈ ప్రాజెక్టు గురించి ఏమీ మాట్లాడలేదు. ఇంతకీ ‘వకీల్ సాబ్’ తర్వాత సినిమా ఏంటి అని అడిగితే.. ప్రస్తుతానికి నెక్స్ట్ ప్రాజెక్ట్ గురించి ఏమీ ఆలోచించట్లేదని.. తన దృష్టంతా ఏప్రిల్ 9న ఈ సినిమా రిలీజ్ కోసం ఎదురు చూస్తున్నానని తెలిపాడు.

ఇక ‘వకీల్ సాబ్’ కోసం పవన్‌తో కలిసి పని చేయడం ఒక లైఫ్ టైం మెమొరీ అన్న వేణు.. ఈ సినిమా స్క్రిప్టు ఆషామాషీగా చేయలేదని.. చాలా సమయం పట్టిందని.. నాలుగు వెర్షన్స్ రాస్తే కానీ.. ఇప్పుడు తెరమీద చూడబోతున్నట్లుగా స్క్రిప్టు రాలేదని చెప్పాడు. ఒరిజినల్ కంటెంట్ దెబ్బ తినకుండా దీనికి కొత్త అంశాలు కలిపినట్లు వేణు తెలిపాడు.