మార్కెటింగ్ రూటు మార్చాల్సిందే దాదా

డిసెంబర్ 24 విడుదల కాబోతున్న దాదా మీద బాలకృష్ణ అభిమానులు చాలా ఆశలు పెట్టుకున్నారు. గత ఏడాది అఖండ 2 తాండవం అంచనాలు అందుకోలేక ఫెయిల్ కావడంతో ఏకంగా సంవత్సరం గ్యాప్ రావడం వాళ్ళ ఎదురుచూపులకు పెద్ద పరీక్ష పెట్టింది. దానికి తోడు మోక్షజ్ఞ ఎంట్రీ అంతకంతా ఆలస్యమవుతూ, ఫైనల్ గా వశిష్ఠ డైరెక్షన్ లో ప్రాజెక్ట్ లాక్ కావడం వరకు ప్రతి పరిణామం నెమ్మదిగా వెళ్ళింది. తాజాగా దాదా ఐటెం సాంగ్ కు సంబంధించిన పోస్టర్ దీపావళి సందర్భంగా రిలీజ్ చేశారు.

తమన్ ట్యూన్ ఎలా ఉంది, బాలయ్య డాన్సులు ఎంత హుషారు ఇస్తాయనేది పక్కన పెడితే ఇప్పటిదాకా వచ్చిన దాదా పోస్టర్లు, లుక్స్, కాస్ట్యూమ్స్ అన్నీ గత చిత్రాలు అఖండ, డాకు మహారాజ్ తరహాలో రెగ్యులర్ గా అనిపించడం సోషల్ మీడియాలో చర్చకు దారి తీస్తోంది. ఇప్పటికీ మాస్ లో బలమైన పట్టున్న బాలకృష్ణని అదే పాత బాణీలో చూపించాల్సిన అవసరం లేదు. ఒకవేళ ఏదైనా లుక్ దాచి పెట్టి ఉంటే కనీసం దానికి సంబంధించిన లీక్స్ అయినా వదిలితే జనంలో ఆసక్తి కలిగి హైప్ ఆటోమేటిక్ గా పెరుగుతుంది.

అసలే బాలయ్యకు మాఫియా డాన్ కథలు అంతగా అచ్చిరావని పూర్వపు చరిత్ర చెబుతోంది. భారీ బడ్జెట్ తో తీసిన అశోక చక్రవర్తి, యువరత్న రానా లాంటివి పెద్ద ఫ్లాప్ అయ్యాయి. ఈ నెగటివ్ సెంటిమెంట్ పోగొట్టాల్సిన బాధ్యత దర్శకుడు గోపీచంద్ మలినేని మీద ఉంది. రెగ్యులర్ సబ్జెక్టు తీసుకుని ఉండొచ్చు కానీ దాన్ని ప్రెజెంట్ చేసే విధానం ఫ్రెష్ గా ఉంటే ఖచ్చితంగా జనాలు థియేటర్లకు పరిగెత్తుకుంటూ వస్తారు. ముఖ్యంగా బాలకృష్ణ లాంటి బలమైన హీరోల కోసం.

అలాంటప్పుడు పబ్లిసిటీ మెటీరియల్ విషయంలో మరిన్ని జాగ్రత్తలు అయితే తీసుకోవాలి. దాదా కోసం బాలకృష్ణ చాలా కష్టపడ్డారు. ప్రమాదానికి గురై ఏకంగా రెండు నెలలకు పైగా రెస్ట్ తీసుకున్నారు. ఇంత ఎఫర్ట్ పెట్టినప్పుడు దానికి తగ్గ ఫలితం ఖచ్చితంగా దొరికే తీరాలి. అసలే దాదాతో నాగార్జున కింగ్ 100, షారుఖ్ ఖాన్ కింగ్ తో పాటు డ్యూన్ 3, అవెంజర్స్ డూమ్స్ డే విడుదల కాబోతున్నాయి. వీటిని దాదా ఫేస్ చేయాలంటే బాలకృష్ణ మాస్ కటవుట్ తో పాటు క్వాలిటీ కంటెంట్ కూడా తప్పనిసరి.