అసలైన అనిరుధ్ బయటికి వచ్చాడు

గత కొంత కాలంగా సౌత్ సెన్సేషన్ అనిరుధ్ రవిచందర్ తన స్థాయికి తగ్గ మ్యూజిక్ ఇవ్వడం లేదని సంగీత ప్రియులు తెగ ఫీలవుతున్నారు. ఈ గ్యాప్ వాడుకునేలా సాయి అభ్యంక్కర్ లాంటి కుర్రాడు దూసుకుపోతున్నాడని వాపోతున్నారు. వాళ్ళు అన్నదాంట్లో నిజం లేకపోలేదు. జన నాయకుడు, మదరాసి, ఇండియన్ 2, కింగ్డమ్, విదముయార్చి, లవ్ ఇన్సూరెన్స్ కంపెనీ ఇవేవి తన స్థాయిలో లేవనేది వాస్తవం. ఒకటి రెండు పాటలు తప్ప ఎలాంటి మేజిక్ చేయలేదు.

జైలర్, దేవర తర్వాత ఆ స్థాయి బ్యాక్ గ్రౌండ్ స్కోర్ అనిరుధ్ రవిచందర్ నుంచి రాలేదు. అయితే తాజాగా విడుదలైన డిసి ఆ కొరత బాగానే తీర్చేలా ఉంది. ఎలాంటి హడావిడి, భీకరమైన సౌండ్లు లేకుండా సింపుల్ గా సాగిపోతూ, వెరైటీ సౌండ్స్ తో దర్శకుడు అరుణ్ మాతేశ్వరన్ ఆలోచనలకు పర్ఫెక్ట్ గా సింక్ అయ్యేలా బక్కోడు (ఫ్యాన్స్ పెట్టుకున్న ముద్దుపేరు) ఇచ్చిన నేపధ్య సంగీతం డాల్బీ అట్మోస్ థియేటర్లలో మోగిపోతోంది. సినిమా మీద పాజిటివ్ ఫీడ్ బ్యాక్ కి ఇదే ప్రధాన కారణం.

ముఖ్యంగా డిసిలో వ్యభిచార గృహం ఫైట్, వామిక గబ్బి విటుల దగ్గరికి వెళ్లి డబ్బులు వసూలు ఎపిసోడ్స్, ఇద్దరు కలిసి పోలీసులతో చేసే పోరాటం, క్లైమాక్స్ లాంటి వాటికి గొప్ప ఎలివేషన్ పడిందంటే దాని వెనుక ఉన్నది అనిరుధ్ రవిచందర్ స్కోరే. యూట్యూబ్ తో పాటు ఇతర ప్లాట్ ఫార్మ్స్ లో కీలకమైన సౌండ్ ట్రాక్స్ ముందే ఇవ్వడం బజ్ పరంగా ప్లస్ అయ్యింది. వాటిని విజువల్స్ తో పాటు థియేటర్లో ఆస్వాదిస్తూ అనిరుధ్ రవిచందర్ అభిమానులు ఎంజాయ్ చేస్తున్నారు.

కమర్షియల్ గా డిసి విజయం ఏ స్థాయిలో ఉంటుందనేది ఇప్పుడే చెప్పలేం కానీ పికప్ మాత్రం అనూహ్యంగా ఉంది. గంటకు పది వేలకు పైగానే టికెట్లు అమ్ముడుపోవడం, వేగంగా బుక్ మై షో ట్రెండింగ్ లోకి రావడం శుభ సూచకంగా చెప్పుకోవచ్చు. నెక్స్ట్ అందరి చూపు నాని ది ప్యారడైజ్ మీద ఉంది. ఓ రేంజ్ ఎలివేషన్లు ఉన్న సబ్జెక్టు కావడంతో జడల్ జమానాకు థియేటర్లు ఊగిపోవాలంటే అనిరుధ్ పోషించే పాత్ర చాలా కీలకం కానుంది. అంచనాలు నిలబెట్టుకుంటే ఫ్యాన్స్ కు పండగే.