జనం ఏమనుకుంటున్నారు నాయకా

రాజకీయ రంగప్రవేశానికి ముందు ఇదే తన చివరి సినిమాగా విజయ్ ప్రకటించుకున్న జన నాయకుడు థియేటర్లలో అడుగు పెట్టేసింది. తమిళనాడులో నిన్నటి నుంచే దీని జ్వరం పీక్స్ కు వెళ్లిపోగా తెలుగు రాష్ట్రాల ప్రధాన కేంద్రాల్లో అభిమానులు సందడి చేయడం కనిపించింది. కొన్ని సింగల్ స్క్రీన్లలో వేసిన ఫాన్ షోలు ఫుల్ అయ్యాయి. అయితే చూసినవాళ్లు ఎలా ఫీలయ్యారు, టాక్ ఏంటి ఇత్యాది విషయాల మీద సామాన్య ప్రేక్షకులు ఆసక్తిగా ఉన్నారు. అదైతే బయటికి వచ్చేసింది.

భగవంత్ కేసరి రీమేక్ గా రూపొందిన జన నాయకుడు మీద ఏమంత ఆశాజనకమైన ఫీడ్ బ్యాక్ కనిపించడం లేదు. బాలయ్య సినిమాని చెడగొట్టారని, విలన్ పాత్రను దారుణంగా డిజైన్ చేసుకున్నారని, క్లైమాక్స్ నవ్వొచ్చేలా కంపోజ్ చేశారని ఇలా రకరకాలుగా కామెంట్స్ ఎక్స్, ఇన్స్ టాలో కనిపిస్తున్నాయి. అయితే కమర్షియల్ మూవీస్ కి తొలి రోజు టాక్ ఎలా ఉన్నా స్టార్ పవర్ వాటిని వీకెండ్ వరకు నిలబెడుతుంది. అందులోనూ విజయ్ హీరో కాబట్టి ఆ సానుకూలత ఎక్కువ పని చేస్తుంది.

మరి ఈ మిక్స్డ్ రెస్పాన్స్ ని జన నాయకుడు ఏ మేరకు తట్టుకుంటాడో చూడాలి. తమిళనాడులో దాదాపు షోలన్నీ ఫుల్ అయిపోగా ఆదివారం దాకా ఇదే పరిస్థితి ఉంటుందని అక్కడి బయ్యర్లు అంచనా వేస్తున్నారు. సినిమా బాగున్నా లేకున్నా తలపతిని ఒకసారి తెరమీద సెలెబ్రేట్ చేసుకోవాలని ఆడియన్స్ నిర్ణయించుకోవడంతో థియేటర్లు నిండుగా కళకళలాడుతున్నాయి. కొన్ని చోట్ల టికెట్లు బ్లాక్ లో రెట్టింపు ధరకు అమ్మినా దొరకని పరిస్థితి తలెత్తింది.

ఇదంతా పక్కన పెడితే కెరీర్ పీక్స్ లో ఉన్నప్పుడే నటనకు స్వస్తి చెప్పిన విజయ్ మొదటి విడతలోనే ముఖ్యమంత్రి కావడం సంచలనం. నిజానికి ఎన్నికలను దృష్టిలో పెట్టుకుని రాసుకున్న ఎపిసోడ్స్ జన నాయకుడులో చాలా ఉన్నాయి. ఒకవేళ పక్కాగా గెలుస్తాడని తెలిసి ఉంటే స్క్రిప్ట్ లో అన్ని మార్పులు చేసేవాళ్ళు కాదేమో. అందుకే కొన్ని సన్నివేశాలు సింక్ లో లేవనిపించేలా ఉన్నాయి. వీకెండ్ అయ్యాక సినిమా ఏ స్థాయిలో నిలుస్తుందనే క్లారిటీ వస్తుంది.