మన బిగ్ బాస్.. వాళ్ల బిగ్ బాస్… ఎంత తేడా?

తెలుగులో అత్యంత ఆదరణ దక్కించుకున్న టీవీ షోల్లో ‘బిగ్ బాస్’ ఒకటి. దీని ద్వారా ఎంతోమంది సాధారణ ప్రజలు సెలబ్రెటీలుగా మారారు. కాస్త పేరున్న టీవీ ఆర్టిస్టులు, సోషల్ మీడియా ఇన్‌ఫ్లుయెన్సర్లు.. ఇంకా పాపులారిటీ సంపాదించారు. కాకపోతే బిగ్ బాస్‌తో వచ్చిన ఫేమ్‌ను సినిమాల కోసం సరిగ్గా ఉపయోగించుకున్న వాళ్లు మాత్రం పెద్దగా కనిపించరు. ఆల్రెడీ ఎన్నో సినిమాల్లో నటించిన శివాజీకి సెకండ్ ఇన్నింగ్స్‌లో ఈ షో కొంత ఉపయోగపడింది తప్ప.. ఇంకెవ్వరికీ కెరీర్ పరంగా దీని వల్ల పెద్దగా పుష్ లభించలేదు.

‘బిగ్ బాస్’ విన్నర్ అయ్యాక కౌశల్ హడావుడిగా కొన్ని సినిమాలు అనౌన్స్ చేశాడు కానీ.. అవి తర్వాత అడ్రస్ లేకుండా పోయాయి. షో ఫాలోయింగ్ చూసి ఎంతో ఊహించుకుని సినిమాలు చేసిన సోహెల్ పరిస్థితి ఏంటో తెలిసిందే. దివి సహా ఎంతోమంది అమ్మాయిలు కూడా బిగ్ బాస్ తర్వాత సినిమాల్లో వెలిగిపోవాలని ప్రయత్నించారు కానీ.. అనుకున్నంత పేరు సంపాదించలేకపోయారు.

కానీ తమిళంలో మాత్రం పరిస్థితి భిన్నం. అక్కడ ఈ షో ద్వారా మంచి గుర్తింపు సంపాదించి, ఆ తర్వాత సినిమాల్లో బ్రేక్ అందుకున్న వాళ్ల సంఖ్య పెద్దదే. ‘కిష్కింధపురి’లో విలన్ పాత్ర చేసిన శాండీ మాస్టర్‌తో పాటు ఒవియా, లాస్లియా, రాజు జయమోహన్, ఆరవ్, దర్శన్ లాంటి వాళ్లకు సినిమాల్లో అవకాశాలు పెరిగాయి. ఐతే వీళ్లందరూ ఒకెత్తయితే.. కెవిన్ మరో ఎత్తు. అతను ‘బిగ్ బాస్’ ఫేమ్‌తో సినిమాల్లో మంచి మంచి అవకాశాలు అందుకుని స్టార్ అయిపోయాడు.

‘డడా’ సూపర్ హిట్ కావడంతో తన రాత మారిపోయింది. స్టార్, బ్లడీ బెగ్గర్, కిస్, మాస్క్ లాంటి సినిమాలతో మంచి గుర్తింపు సంపాదించాడు.
ఇప్పుడు తన కెరీర్లోనే అతి పెద్ద సినిమాతో వస్తున్నాడు కవిన్. అతను లేడీ సూపర్ స్టార్ నయనతార‌కు జోడీగా నటించడం విశేషం. వీరి కలయికలో తెరకెక్కిన ‘హాయ్’ మూవీ ఆగస్గు 14న విడుదల కానుంది. కవిన్ కంటే నయన్ వయసులో పెద్ద. ఐతే అందుకు తగ్గట్లే వయసు అంతరం ఉన్న అమ్మాయి, అబ్బాయి మధ్య నడిచే కథ ఇది. అనామకుడిగా ‘బిగ్ బాస్’ షోలో అడుగు పెట్టిన కవిన్.. అక్కడ వచ్చిన గుర్తింపును సద్వినియోగం చేసుకుంటూ నయన్‌కు జోడీగా నటించే స్థాయికి ఎదగడం స్ఫూర్తిదాయకమే.