పాజిటివ్ టాక్ ఉన్నా పనవ్వడం లేదా

బాక్సాఫీస్ వద్ద లెనిన్ తప్ప జనాలకు వేరే ఆప్షన్ కనిపించడం లేదు. ఇతర కొత్త సినిమాలు విడుదలైనా వాటి గురించి ఊసు కానీ, సోషల్ మీడియా డిస్కషన్ కానీ పెద్దగా జరగడం లేదు. వాటిలో హృదయం మురళి ఒకటి. గద్దలకొండ గణేష్ తో టాలీవుడ్ కు పరిచయమైన తమిళ హీరో అధర్వ ఇందులో కథానాయకుడు. ప్రీతీ ముకుందన్, కయదు లోహర్, మాళవిక మోహనన్, ఫహద్ ఫాసిల్, తమన్ లాంటి క్యాస్టింగ్ తో పాటు ఫీల్ గుడ్ మ్యూజిక్ ఉన్న ఈ మూవీ శనివారం థియేటర్లలో అడుగు పెట్టింది.

ప్రాధమికంగా పాజిటివ్ టాక్ తెచ్చుకున్న హృదయం మురళికి కలెక్షన్లు పెద్దగా కనిపించడం లేదు. కారణం అధర్వకు ఇక్కడ ఇమేజ్ లేకపోవడం. వివిధ దశల్లో తన ప్రేమను ఇష్టపడిన అమ్మాయిలకు వ్యక్తపరచలేకపోయిన ఒక వ్యక్తి జీవితమే హృదయం మురళి కథ. ఇందులో నోస్టాల్జియా మూమెంట్స్ ని బాగా రీ క్రియేట్ చేశారు. చిన్న ట్విస్టులు, సరదా సంఘటనలు, విసిగించకుండా సాగే కథనం ఇలా యూత్ కి కావాల్సిన టైం పాస్ ఎలిమెంట్స్ అయితే ఉన్నాయి.

కొన్ని నెగటివ్ పాయింట్స్ ఉన్నా కానీ వాటి కన్నా సానుకూలంగా ఉన్న పబ్లిక్ టాకే ఎక్కువ బయటికి వచ్చింది. అయితే హృదయం మురళి మన దగ్గర నిలబడుతుందా లేదానేది వేచి చూడాలి. ఎందుకంటే వీకెండ్ మొత్తం లెనిన్ డామినేషన్ కొనసాగింది. దాని వల్ల ఇతర సినిమాలు ఎఫెక్ట్ అయిన మాట వాస్తవం. హృదయం మురళి చేసుకున్న వీక్ ప్రమోషన్స్ వల్ల అసలది రిలీజైన విషయమే చాలా మంది కామన్ ఆడియన్స్ కు తెలియకుండా పోయింది.

ఈ రెండు మూడు రోజుల్లో ఏమైనా ప్రచారాలు మొదలుపెడితే కొంచెం బెటర్ గా ఉండొచ్చు కానీ ఆ సూచనలు కనిపించడం లేదు. తమిళంలో ఇదయం మురళి బాగానే ఆడుతున్నట్టు రిపోర్ట్స్ స్పష్టం చేస్తున్నాయి. కలెక్షన్లు కూడా చెప్పుకోదగ్గట్టే ఉన్నాయి. ఎటొచ్చి మన దగ్గరే కొంచెం అటుఇటు ఊగుతోంది. సంగీత దర్శకుడిగా లెనిన్, నటుడు ప్లస్ మ్యూజిక్ డైరెక్టర్ గా హృదయం మురళి ఈ రెండు సినిమాలు ఒకేసారి రిలీజై తమన్ కు ఒక స్పెషల్ డేని మిగిల్చాయి.