దిల్ రాజు కోరుకున్న మార్పులు జరగాలి

టాలీవుడ్ సీనియర్ మోస్ట్ అనుభవజ్ఞులు ఎవరంటే టాప్ ఫైవ్ లో ఖచ్చితంగా ఉండే పేరు దిల్ రాజు. డిస్ట్రిబ్యూటర్, నిర్మాతగా ఆయన గడించిన అపార అనుభవం అప్పుడప్పుడు జడ్జ్ మెంట్ల విషయంలో తప్పులు చేసేలా ప్రేరేపిస్తుంది. అందుకే ఫ్యామిలీ మ్యాన్, గేమ్ ఛేంజర్ లాంటి పొరపాట్లు కనిపిస్తాయి. ఇటీవలే ఇచ్చిన ఒక పాడ్ క్యాస్ట్ ఇంటర్వ్యూలో దిల్ రాజు చెప్పిన పలు విషయాలు సోషల్ మీడియాలో వైరలవుతున్నాయి. ముఖ్యంగా కలెక్షన్ల ట్రెండ్ గురించి కుండ బద్దలు కొట్టేశారు.

ఒక పెద్ద హీరో సినిమాకు మొదటి రోజు ఎంత కలెక్షన్ వచ్చిందో నిర్మాతకు మాత్రమే తెలుస్తుందని, అవతల ఇంకో స్టార్ మూవీకి పెద్ద నెంబర్ వేస్తే దాన్ని దాటిపోయామని చెప్పేందుకు తాము కూడా అదే దారిలో వెళ్లాల్సి వస్తోందని క్లారిటీ ఇచ్చారు. ఫ్యాన్ వార్స్ ప్రస్తావన కూడా ఈ సందర్భంగా తీసుకొచ్చారు. గతంలో నాగవంశీ అన్నట్టు కొన్ని వర్గాలను సంతృప్తి పరిచేందుకు కొన్ని చేయాల్సి వస్తుందని చెప్పడం హాట్ టాపిక్ గా మారింది. బడ్జెట్స్ డిస్కషన్ కూడా వచ్చింది.

ఒక ప్యాన్ ఇండియా మూవీ ఎన్ని వందల కోట్లతో తీసినా దాంట్లో హీరో రెమ్యునరేషన్ నలభై శాతం దాకా ఉంటుందని, అందువల్లే బడ్జెట్ పెరిగిపోయి, టికెట్ రేట్లు పెంచుకుని, థియేటర్ ఫుట్ ఫాల్స్ తగ్గించుకునే పరిస్థితి తలెత్తిందని ఒప్పుకున్నారు. రివ్యూల గురించి మాట్లాడుతూ ఏదో కోర్ట్ ఆర్డర్ లేదా ప్రభుత్వ ఉత్తర్వు వస్తే తప్ప రిలీజ్ రోజు రివ్యూలు చేయకుండా ఎవరిని ఆపలేమని, అందుకే కాపీ రైట్స్ పేరుతో వేస్తున్న స్ట్రైక్స్ మంచిదే అని తనకు అనిపిస్తోందని ఓపెన్ గా చెప్పేశారు.

ఇలా బోలెడు ఇండస్ట్రీ విషయాలు చెప్పిన దిల్ రాజు కోరుకున్నట్టు నిజంగా మార్పు చెందే దిశగా పరిశ్రమ వెళ్తుందా అంటే అనుమానమే. ఎందుకంటే పారితోషికాలు ఇతరత్రా ఆర్టిస్టుల భారీ ఖర్చులు కంట్రోల్ చేయలేని స్టేజికి వెళ్లిపోయాయి. ఇంకోవైపుకి ఓటిటి మార్కెట్ రోజురోజుకి పడిపోతోంది. ఈ నేపథ్యంలో అందరూ వాస్తవిక కోణంలో ఆలోచించి బడ్జెట్ నియంత్రణ మీద దృష్టి పెడితే రిలీజులు ఆలస్యం కాకుండా ఉండటంతో పాటు హీరోలు వేగంగా సినిమాలు చేస్తారు.