బాహుబలి 3… వినడానికి బాగుంది కానీ…

తాజాగా నెట్ ఫ్లిక్స్ లో ‘బాహుబలి ది టార్చ్ బేరర్’ అనే డాక్యు సిరీస్ విడుదలయ్యింది. మొత్తం నాలుగు ఎపిసోడ్లు కలిపి సుమారు రెండు గంటల నిడివితో ఇంతకు ముందు ఎప్పుడూ చూడని మేకింగ్ కంటెంట్ అందులో పొందుపరిచారు. ప్రభాస్, అనుష్క, రాజమౌళితో సహా ప్రధాన కాస్ట్ అండ్ క్రూ పంచుకున్న విశేషాలు, సెట్స్ లో పడ్డ అష్టకష్టాలు, తెరవెనుక ఏం జరిగిందో వివరించే సంఘటనలు ఇవన్నీ ఇందులో ఉన్నాయి. మొదలుపెడితే చివరి దాకా చూసేలా ఉంది.

చివర్లో బాహుబలి 3 ఉంటుందని దగ్గుబాటి రానాతో చెప్పించడం, దానికి పక్కనే ఉన్న ప్రభాస్, అనుష్క సానుకూలంగా సంకేతాలు ఇవ్వడంతో ఒక్కసారిగా ప్రభాస్ అభిమానులు ఆశ్చర్యపోయారు. నిజానికి ఇది మంచి ఐడియానే. వినడానికి చాలా బాగుంది. కానీ కార్యరూపం దాల్చడం అంత సులభం అయితే కాదు. ఎందుకంటే బాహుబలి ఎటర్నల్ వార్ పేరుతో ఆల్రెడీ ఒక యానిమేటెడ్ మూవీ విడుదలకు రెడీ అవుతోంది. అందులో బాహుబలి గతం ఉంటుంది.

మరి బాహుబలి 3 నిజంగా తీసే పనైతే ఏం కథ చెబుతారనేది అసలు ట్విస్ట్. టార్చ్ బేరర్ లో ఉన్న వీడియో తాజాగా షూట్ చేసింది కాదు. ముగ్గురి లుక్స్ ని బట్టి చూస్తే గత సంవత్సరం తీసినట్టు ఉంది. సో ఆ టైంలో ఏదో ఫ్లోలో బాహుబలి3 అనేసుకుని ఉండొచ్చు. దాన్నే ఇందులో పొందుపరిచి ఉండొచ్చు. ఆర్ఆర్ఆర్ నుంచి గమనిస్తే రాజమౌళి ఎక్కడా మూడో బాహుబలిని తీస్తానని మాట వరసకు కూడా చెప్పలేదు. సో వెంటనే ఒక అభిప్రాయానికి రాలేం.

ఒకవేళ నిజంగా జరిగితే అంతకన్నా సంతోషం డార్లింగ్ ఫ్యాన్స్ కి ఏముంటుంది కానీ సగటు మూవీ లవర్స్ మాత్రం వారణాసి తర్వాత రాజమౌళి ఇంకో కొత్త జానర్, సబ్జెక్టుతో తెలుగు సినిమా స్థాయిని మరింత పెంచాలని కోరుతున్నారు. బాహుబలి బిగినింగ్, బాహుబలి కంక్లూజన్, బాహుబలి ఎపిక్, బాహుబలి టార్చ్ బేరర్, బాహుబలి ఎటర్నల్ వార్ పేర్లతో ఇలా ఫ్రాంచైజ్ మొత్తం పిండేశారు కదా. మళ్ళీ ఇంకో సీక్వెల్ అవసరమా అనే కామెంట్స్ లేకపోలేదు. చూడాలి మరి ఏం చేస్తారో.