ఆర్టిస్టులను ఇంకొంచెం వాడుకుని ఉంటే

పెద్దిలో అందరూ రామ్ చరణ్, జగపతిబాబు, శివరాజ్ కుమార్ పెర్ఫార్మన్స్ గురించి మాట్లాడుతున్నారు. అందులో ఆశ్చర్యం ఏమి లేదు. దర్శకుడు బుచ్చిబాబు ఈ క్యారెక్టర్లను తీర్చిదిద్దిన విధానం అలా కుదిరింది. అయితే కొంత మిక్స్డ్ టాక్ రావడం వెనుక క్యాస్టింగ్ ని సరిగా వాడుకోలేదనే కామెంట్స్ కూడా అభిమానుల నుంచి వినిపిస్తున్నాయి. ముఖ్యంగా ఫస్ట్ హాఫ్ లో ఎక్కువ కనిపించిన విలన్ దివ్యెందు శర్మ రెండో సగం క్లైమాక్స్ లో తప్ప మళ్ళీ ఎక్కడా కనిపించడు.

రావు రమేష్ ఉన్నాడని ఫలానా సీన్ గుర్తు చేస్తే తప్ప సామాన్య ప్రేక్షకులకు ఫ్లాష్ కానంత తక్కువ నిడివి ఆయనకు పెట్టారు. పుష్పలో కూడా లెన్త్ ఎక్కువ లేకపోయినా మంత్రి, సిఎం క్యారెక్టర్ ద్వారా సుకుమార్ ఎలా వాడుకున్నారో తెలిసిందే. శ్రీకాంత్ అయ్యంగార్, జాన్ విజయ్ తదితరులకు గెటప్స్ ఘనంగా ఇచ్చారు కానీ పట్టుమని రెండు డైలాగులు లేవు. కమెడియన్ సత్య మాట్లాడేది కూడా చాలా తక్కువ. ఇలా ఎంతో మందిని బుచ్చిబాబు అలా టచ్ చేసి వదిలేశారనే మాట గట్టిగానే ఉంది.

కేవలం రామ్ చరణ్ మీదే ఫోకస్ పెట్టకుండా మరికొన్ని థ్రెడ్స్ ద్వారా అందరినీ వాడుకునేలా కొన్ని మార్పులు చేసి ఉంటే టెంపో పెరిగేదన్న అభిప్రాయాన్ని కొట్టి పారేయలేం. జాన్వీ కపూర్ సైతం ఇంటర్వెల్ తర్వాత చాలా సేపు కనిపించదు. ఇదంతా కథానుసారం చేశామని టీమ్ చెప్పుకున్నా ప్రాముఖ్యత కలిగిన ఆర్టిస్టులు అంత సేపు స్క్రీన్ మీద కనిపించకుండా పోతే కనెక్టివిటీ తగ్గిపోతుంది. పెద్దికొచ్చిన సమస్యల్లో ఇదీ ఒకటని చెప్పక తప్పదు.

దీని వల్ల పెద్ది ఎంతవరకు ప్రభావితం చెందిందనేది ఇప్పుడప్పుడే తేలదు. కనీసం వారం పది రోజులు వెయిట్ చేయాల్సి ఉంటుంది. చరణ్ లాంటి టాప్ హీరోకు మొదటి వీకెండ్ ఫుల్స్ పడటం పెద్ద విషయం కాదు. ఒకవేళ వీక్ డేస్ వచ్చాక కూడా ఆక్యుపెన్సీలు బలంగా ఉంటే పెద్ది చేతిలో సాలిడ్ బ్లాక్ బస్టర్ ఉన్నట్టే. ట్రేడ్ అయితే ఆ నమ్మకంతోనే ఉంది. స్క్రీన్ స్పేస్ వల్లనేమో ప్రమోషన్స్ లో జగపతిబాబు తప్ప వేరే ఏ ఇతర ఆర్టిస్టులు కనిపించలేదు కాబోలు.