ఇవి ‘టైమింగ్’ హిట్లు

ఈ రోజుల్ల సినిమాలు తీయడం కంటే.. వాటిని సరిగ్గా రిలీజ్ చేయడం కీలకంగా మారింది. రిలీజ్ టైమింగ్‌ను బట్టి కొన్నిసార్లు సినిమాల ఫలితాలు కూడా మారిపోతుంటాయి. కొన్ని సినిమాలకు బాక్సాఫీస్ టైమింగ్ కలిసి రాక అనుకున్న ఫలితాన్ని అందుకోవు. కొన్నేమో బాక్సాఫీస్ దగ్గర అనుకూల పరిస్థితులను ఉపయోగించుకుని అనుకున్న దాని కంటే పెద్ద విజయం సాధిస్తుంటాయి.

గత ఏడాది తెలుగులో ‘లిటిల్ హార్ట్స్’ అనే చిన్న సినిమా ఏకంగా రూ.40 కోట్ల వసూళ్లు సాధించడం అనూహ్యం. సమ్మర్లో సరైన సినిమాలు లేని టైంలో ఈ చిన్న చిత్రం మంచి టాక్ తెచ్చుకోవడంతో జనం ఎగబడి చూశారు. సినిమా ఎవ్వరూ ఊహించని రేంజికి వెళ్లిపోయింది. వేరే టైంలో రిలీజైతే ఆ సినిమా హిట్టయ్యేదేమో కానీ.. ఆ స్థాయిలో అయితే వసూళ్లు రాబట్టేది కాదు.

ఇక ఈ ఏడాది సంక్రాంతి సినిమాల సంగతి తెలిసిందే. మన శంకర వరప్రసాద్ గారు, అనగనగా ఒక రాజు, నారీ నారీ నడుమ మురారి.. వీటిలో ఏ సినిమా అయినా వేరే టైంలో రిలీజైతే ఆ స్థాయిలో వసూళ్లు రాబట్టేవి కావు. ‘మన శంకర వరప్రసాద్ గారు’ సంక్రాంతికి రాకుండా రీజనల్ ఇండస్ట్రీ హిట్టయ్యేంత సినిమానా అంటే టక్కున అవునని చెప్పలేం.

అనగనగా ఒక రాజు, నారీ నారీ నడుమ మురారి చిత్రాలు వేరే సమయంలో అయితే యావరేజ్ అనిపించుకునేవేమో. కానీ సంక్రాంతి టైంలో అవి సూపర్ హిట్లు అయ్యాయి. గత నెలలో వచ్చిన ‘డెకాయిట్’కు కూడా టైమింగ్ బాగా కలిసొచ్చింది. సరైన సినిమాలు లేని టైంలో రిలీజ్ కావడం వల్ల యావరేజ్ టాక్‌తోనూ సినిమా మంచి వసూళ్లు సాధించింది.

ఇక వర్తమానంలోకి వస్తే.. ‘కరుప్పు’ అయితే పైన చెప్పుకున్న ఏ చిత్రంతో పోల్చి చూసినా తక్కువ స్థాయి చిత్రమే. తెలుగులో అయితే ఈ సినిమాకు నెగెటివ్ టాకే వచ్చింది. కానీ మిడ్ సమ్మర్లో స్టార్ హీరోల సినిమాలు లేక ప్రేక్షకులు తీవ్రంగా నిరాశ చెందుతున్న సమయంలో రిలీజ్ కావడం దీనికి బాగా కలిసొచ్చింది.

సినిమాకు టాక్ అంత బాలేదని తెలిసినా.. జనం థియేటర్లకు వచ్చి ఈ సినిమా చూశారు. తెలుగులో కూడా అనుకున్న దాని కంటే చాలా బాగా ఆడిన సినిమా.. తమిళంలో అయితే బ్లాక్ బస్టర్ రేంజికి వెళ్తోంది. దీన్ని బట్టి సినిమాలకు రిలీజ్ టైమింగ్ అన్నది చాలా ముఖ్యం అని అర్థం చేసుకోవాలి.