చిన్న నటుడే కానీ పెద్ద నిజం చెప్పాడు

పెళ్లి చూపులు, జాతి రత్నాలు టైంలో బిజీ ఆర్టిస్టుగా మారిపోయిన రాహుల్ రామకృష్ణ ఈ మధ్య కనిపించడం తగ్గించేశాడు. అడపాదడపా చేస్తున్నాడు కానీ హిట్లు పడకపోవడంతో పాటు సత్య లాంటి కమెడియన్లు దూసుకురావడం తన కెరీర్ మీద ప్రభావం చూపించింది. దానికి తోడు అప్పుడప్పుడు పలు విషయాల మీద ఎక్స్ ట్రీమ్ గా స్పందించడం అవకాశాలను ఎఫెక్ట్ చేసిందని సన్నిహితులు అంటుంటారు. సరే ఇప్పుడీయన టాపిక్ ఎందుకు వచ్చిందో చూద్దాం.

ఎక్స్ వేదికగా రాహుల్ చేసిన మెసేజ్ లో థియేటర్లు ఎందుకు ఖాళీగా ఉన్నాయో ప్రతి ఒక్కరు విశ్లేషించుకోవాలని, క్వాలిటీ లేకుండా కంటెంట్ ఇచ్చి వేరే సాకులు చెప్పడం వల్ల ఎలాంటి లాభం లేదని అన్నాడు. ఎండలు, ఐపీఎల్, టికెట్ రేట్లు లాంటి ఎన్నో అడ్డంకులు దాటుకుని ప్రేక్షకులు థియేటర్లకు రావాలంటే బిగ్ స్క్రీన్ మీద ఖచ్చితంగా చూడాలనిపించే కంటెంట్ ఇవ్వాలని చెప్పాడు. అది లేకుండా ఏం చేసినా పైసా ప్రయోజనం ఉండదని అందరిని ఉద్దేశించి చురకలు వేశారు.

రాహుల్ రామకృష్ణ చెప్పిందాంట్లో నిజముంది. కొన్ని వారాలుగా టాలీవుడ్ థియేటర్ల పరిస్థితి చాలా దారుణంగా ఉంది. ఆయా యూనిట్లు హైదరాబాద్ లో రెండు మూడు మల్టీప్లెక్సులు ఫుల్ అవ్వడం సోషల్ మీడియాలో చూపించి ఏపీ తెలంగాణ మొత్తం అలాగే ఉందని తమను తాము మోసం చేసుకోవడం తప్ప క్షేత్ర స్థాయిలో పరిస్థితి దానికి వ్యతిరేకంగా ఉంది. రిలీజ్ రోజే మొదటి షోలు క్యాన్సిల్ అయ్యేంత దారుణంగా కొన్ని సినిమాలు కనీసం పబ్లిసిటీ ఖర్చులు తేవడం లేదు.

ఐపీఎల్ ఎండలు మనకు కొత్త కాదు. రెండు దశాబ్దాలుగా ఉన్నాయి. మరి ప్రతిసారి థియేటర్లు బోసిపోలేదుగా. ఈ ఏడాది మాత్రమే ఎందుకు ఇలా జరిగిందంటే కనీస స్థాయిలో ఆడియన్స్ మెప్పించేలా సినిమాలు లేకపోవడమే. జనాన్ని టేకెన్ ఫర్ గ్రాంటెడ్ గా తీసుకుని సీరియల్ టైపు కథలు, అవసరం లేని వయొలెన్స్ ఎలివేషన్లతో విసిగించేస్తున్నారు. అసలు పబ్లిసిటీ మీద పెట్టిన శ్రద్ధ స్క్రిప్ట్ మీద పెడితే ఎన్నో అద్భుతాలు జరుగుతాయి. కానీ వినేదెవరు పట్టించుకునేదెవరు.