రెహమాన్ భయ్యానే బరువు తగ్గించాలి

పెద్ది విడుదల తేదీ డిస్కషన్లు ఎడతెగడం లేదు. జూన్ 4 పక్కా అని డిస్ట్రిబ్యూషన్ వర్గాలు, అభిమాన సంఘాల మధ్య చర్చ జరుగుతుండగా నిర్మాతల వైపు నుంచి ఎలాంటి కన్ఫర్మేషన్ రావడం లేదు. ఈసారి తొందరపడకూడదనే ఉద్దేశంతో కొత్త పోస్టర్ రెడీ అయినా సరే వదలకుండా సైలెంట్ గా ఉన్నట్టు తెలుస్తోంది. ఇంకోవైపు సోషల్ మీడియాలో హ్యాండిల్స్ జూన్ 4 ప్రచారాన్ని హోరెత్తిస్తున్నాయి. బుచ్చిబాబుని నేరుగా అడిగితే సమాధానం చెప్పడం లేదట.

ఇప్పుడు అందరి చూపు ఏఆర్ రెహమాన్ మీదకు వెళ్తోంది. ఎందుకంటే కీలకమైన రీ రికార్డింగ్ కి ఎంత సమయం అడుగుతారో అనే టెన్షన్ యూనిట్ లోనే కాదు ఫ్యాన్స్ లోనూ ఉంది. బెస్ట్ ఇవ్వాలంటే తగినంత టైం డిమాండ్ చేసే రెహమాన్ హడావిడి పడటం చాలా అరుదు. ఒకవేళ రిలీజ్ డేట్ ఒత్తిడి, నిర్మాణ సంస్థ బిజినెస్ వ్యవహారాలు లాంటివి తీవ్రంగా ఉంటే స్పీడ్ పెంచుతారు కానీ తన నుంచి మంచి స్కోర్ ఆశిస్తే మాత్రం ప్రెజర్ చేయకూడదనేది రెహమాన్ సిద్ధాంతం.

బుచ్చిబాబు మీద రెహమాన్ కు చాలా సాఫ్ట్ కార్నర్ ఉంది. పెద్ది కథను చెప్పిన విధానం, తనని ఒప్పించడం స్పెషల్ గా చూస్తున్నారు. సో ఇలాంటి కంటెంట్ కి న్యాయం చేయాలనే భావన ఆయనలోనూ ఉంది. రెండు పాటలు ఆల్రెడీ చార్ట్ బస్టర్స్ అయ్యాయి. ముఖ్యంగా చికిరి చికిరి ఏకంగా బిజినెస్ రేంజ్ పెంచింది. రైరై రారాలో రామ్ చరణ్ డాన్సులు డామినేట్ చేశాయి కానీ దానికి రెహమాన్ ఇచ్చిన ట్యూన్ మాములు మాస్ కాదు.

ఇంకో రెండు పాటలు రావాలి. ప్రస్తుతం లిరికల్ వీడియోస్ రెడీ అవుతున్నాయి. బీజీఎమ్ ఫలానా తేదీ లోపు ఇస్తానని రెహమాన్ నుంచి హామీ వస్తే చాలు జూన్ 4 పోస్టర్ బయటికి వస్తుందని ఇన్ సైడ్ టాక్. ఆయన ప్రస్తుతం పెద్ది ఒక్కదాని మీదే పని చేయడం లేదు. రామాయణ పార్ట్ 1 వర్క్ జరుగుతోంది. ప్రభుదేవా మూన్ వాక్, రవి మోహన్ జీనీ, ఇంతియాజ్ అలీ బాలీవుడ్ మూవీ, సన్నీ డియోల్ లాహోర్ 1947 పోస్ట్ ప్రొడక్షన్ లో ఉన్నాయి. సో సమస్య ఏంటో అర్థమయ్యిందిగా.