మాయమైన మెగా కోడలు… వస్తోంది

వరుణ్ తేజ్‌ను పెళ్లి చేసుకుని మెగా ఫ్యామిలీలోకి కోడలిగా వెళ్లిన లావణ్య త్రిపాఠి.. తర్వాత సినిమాలకు దాదాపుగా దూరమైనట్లే కనిపించింది. ఐతే పెళ్లి తర్వాత మధ్యలో ఒక వెబ్ సిరీస్‌లో మాత్రమే నటించిన లావణ్య.. కొంచెం గ్యాప్ తర్వాత ‘సతీ లీలావతి’ అనే సినిమా చేసింది. ఈ సినిమా గత ఏఢాదే విడుదల కావాల్సింది. కానీ అనివార్య కారణాలతో ఆలస్యం అయింది. 

ఈ ఏడాది మార్చి మొదటి వారంలో రిలీజ్‌కు ఏర్పాట్లు చేసినా.. ఎందుకో చివరి నిమిషంలో ఈ చిత్రం రేసు నుంచి తప్పుకుంది. సినిమా వాయిదా పడ్డట్లు కూడా ప్రకటించని మేకర్స్ సైలెంట్‌గా ఉండిపోయారు. ఐతే రెండు నెలల గ్యాప్ తర్వాత కొత్త రిలీజ్ డేట్‌తో రాబోతోంది ‘సతీ లీలావతి’. మే 8న ఈ చిత్రాన్ని ప్రేక్షకుల ముందుకు తీసుకురాబోతున్నట్లు మేకర్స్ ప్రకటించారు.

లేడీ ఓరియెంటెడ్ మూవీ అయిన ‘సతీలీలావతి’లో లావణ్య సరసన ‘శాకుంతలం’ ఫేమ్, మలయాళ నటుడు దేవ్ మోహన్ నటించాడు. భీమిలి కబడ్డీ జట్టు, ఎస్ఎంఎస్ లాంటి సినిమాలు తీసిన తాతినేని సత్య ఈ చిత్రాన్ని రూపొందించాడు. రెండు భిన్న కుటుంబాల నుంచి వచ్చిన అమ్మాయి, అబ్బాయి.. పెళ్లి తర్వాత ఎలాంటి పరిస్థితులు ఎదుర్కొన్నారు.. ఈ క్రమంలో వివాహ బంధంలోని విశిష్ఠతను ఎలా తెలుసుకున్నారు అన్నది ఈ చిత్రంలో చూపించారు. ఇందులో కొన్ని థ్రిల్లింగ్ అంశాలు కూడా ఉన్నాయి.

స్టార్ మ్యూజిక్ డైరెక్టర్ మిక్కీ జే మేయర్ ఈ చిత్రానికి సంగీతం అందించాడు. కొత్త నిర్మాత నాగమోహన్ ఈ చిత్రాన్ని ప్రొడ్యూస్ చేశాడు. త్వరలోనే ‘సతీలీలావతి’ ట్రైలర్‌ను చిత్ర బృందం విడుదల చేయబోతోంది. మే 8న రవిబాబు సినిమా ‘రేజర్’తో ‘సతీలీలావతి’ పోటీ పడబోతోంది.  సినిమా బాగా ఆలస్యమై, రిలీజ్ డేట్‌లు మార్చుకున్న నేపథ్యంలో ఈసారి లావణ్య అండ్ టీం ప్రమోషన్లు కొంచెం గట్టిగా చేసి సినిమాను పుష్ చేయాల్సిన అవసరముంది.