విశ్వాసం పెంచిన విశ్వంభర

సరిగ్గా ఏడాది క్రితం టీజర్ తో విపరీతమైన నెగటివిటీని మూటగట్టుకున్న విశ్వంభర ఏకంగా ఏడాది పాటు సైలెంట్ గా ఉండటం చిరంజీవికి ఎప్పుడూ ఎదురు కాని అనుభవం. విఎఫ్ఎక్స్ మీద ట్రోలింగ్ జరిగే స్థాయిలో కంటెంట్ ఇవ్వడంతో కొంత కాలం పాటు టీమ్ మౌనంగా ఉండిపోయింది. సోషల్ మీడియాలో కామెంట్స్ భరిస్తూ వచ్చింది. మెగాస్టార్ సైతం తప్పెక్కడ జరిగిందో గుర్తించి దానికి అనుగుణంగా మార్పులు చేయమని దర్శకుడు వశిష్ఠకు సూచించడంతో క్వాలిటీ పెరుగుతుందనే నమ్మకం ఫ్యాన్స్ లో కలిగింది. ఇవాళ నిమిషం పాటు ఉండే చిన్న గ్లిమ్ప్స్ ని చిరు పుట్టినరోజు సందర్భంగా వదిలారు.

అసుర లక్షణాలున్న రాక్షసుడు ఒక జాతి వినాశనానికి పూనుకుంటే వాడి సమూహాన్ని ఎదిరించేందుకు వచ్చిన ఒక సాహసికుడు చరిత్రలో నిలిచిపోయేలా ఏం చేశాడనే థీమ్ ని వాయిస్ ఓవర్ తో వినిపించి కొన్ని విజువల్స్ చూపించారు. ఫస్ట్ షాట్లో పెద్ద తేలు మట్టి లో నుంచి బయటికి రావడంతో మొదలుపెట్టి చివరి షాట్ లో ఒక పెద్ద కన్నుని చిరంజీవి తన చేతిలో పట్టుకోవడం దాకా కొంచెం డిఫరెంట్ గా అనిపించింది. ఈసారి చాలా తెలివిగా ఎఫెక్ట్స్ తక్కువగా అవసరమున్న సీన్లతో మాత్రమే గ్లిమ్ప్స్ ని కట్ చేశారు. మట్టిలో జరిగే ఫైట్ తాలూకు శాంపిల్స్ ని చూపించి ఆఖర్లో మెగాస్టార్ ని రివీల్ చేశారు.

విడుదలకు ఇంకా చాలా టైం ఉంది కాబట్టి ఇంతకంటే ఆశించలేం కానీ తగ్గిపోయిన విశ్వాసాన్ని కొంచెం పెంచడంలో వశిష్ఠ సక్సెస్ అయ్యాడు. కాకపోతే ఇది చాలదు. దీనికన్నా ముందు రిలీజయ్యే మన శంకర వరప్రసాద్ గారు కోసం విశ్వంభరకు కొంత కాలం లో ప్రొఫైల్ మైంటైన్ చేయడం ఖాయం. అంతా బాగానే ఉంది కానీ ఎంఎం కీరవాణి బీజీఎమ్ లో కొంచెం మెరుపు తగ్గిందనిపిస్తుంది. ఫైనల్ స్కోర్ ఇది కాదు కాబట్టి ఇప్పుడే దాని మీద కామెంట్ చేయలేం టెక్నికల్ గా సాలిడ్ కంటెంట్ ఉన్న నమ్మకాన్ని కలిగించిన విశ్వంభరని మళ్ళీ కొత్త అప్డేట్స్ ఫిబ్రవరి నుంచి ఎక్స్ పెక్ట్ చేయొచ్చు.