సమ్మర్ అయ్యాకే అసలు వేడి

కొవిడ్ మొదలైన దగ్గర్నుంచి వేసవిలో సినిమాల సందడి అనుకున్నంతగా ఉండట్లేదు. కరోనా ప్రభావంతో రెండు సీజన్లు వేస్టయిపోగా.. ఆ తర్వాతి ఏడాది ‘ఆర్ఆర్ఆర్’తో సందడి నెలకొంది. కానీ గత రెండేళ్లూ భారీ చిత్రాల సందడి కనిపించలేదు. ఈ ఏడాది అయితే పరిస్థితి మరీ దారుణం. ‘హిట్-3’ అనే ఈ సీజన్‌కు అతి పెద్ద సినిమా అయింది. ఆ స్థాయి సినిమాలు కూడా ఇంకేవీ రిలీజ్ కాలేదు. దీంతో సమ్మర్ లాంటి క్రేజీ సీజన్లో బాక్సాఫీస్ కళ తప్పింది. ఐతే వేసవిలో హీట్ తగ్గినా.. ఆ సీజన్ అయ్యాక మాత్రం బాక్సాఫీస్ బాగా వేడెక్కబోతోంది.

జూన్ మొదటి వారం నుంచి నెల రోజుల పాటు ప్రతి వారం ఓ క్రేజీ మూవీ రిలీజ్ కానుండడం ఇటు సినీ ప్రియులకు.. అటు ఇండస్ట్రీ జనాలకు ఉత్సాహాన్నిచ్చే విషయమే. జూన్ మొదటి వారంలో కమల్ హాసన్-మణిరత్నం సినిమా ‘థగ్ లైఫ్’ రాబోతోంది. తమిళంలో భారీ అంచనాాలున్న ఈ సినిమాకు తెలుగులోనూ క్రేజ్ ఉంది. ఇక ఎప్పుడో విడుదల కావాల్సిన పవర్ స్టార్ పవన్ కళ్యాణ్ సినిమా ‘హరి హర వీరమల్లు’ పలుమార్లు వాయిదా పడి.. చివరికి జూన్ 12కు ఫిక్స్ అయింది.

ఈసారి రిలీజ్ విషయంలో సందేహాలేమీ లేవు. పక్కాగా ఆ రోజు వచ్చేస్తుంది. మూడో వారానికి అక్కినేని నాగార్జున-ధనుష్‌ల ‘కుబేర’ షెడ్యూల్ అయింది. ఆ సినిమా కూడా తెలుగు-తమిళ భాషల్లో మంచి అంచనాల మధ్య విడుదల కాబోతోంది. తర్వాతి వారం మంచు విష్ణు పాన్ ఇండియా మూవీ ‘కన్నప్ప’ విడుదల కానుంది. ప్రభాస్ కీలక పాత్ర పోషించడంతో ఈ సినిమాకూ మంచి హైప్ ఉంది. ఇక జులై 4న రానున్న విజయ్ దేవరకొండ మూవీ ‘కింగ్‌డమ్’ మీదా భారీ అంచనాలున్న సంగతి తెలిసిందే. ఈ చిత్రాలతో నెల రోజుల పాటు బాక్సాఫీస్ కళకళలాడడం ఖాయంగా కనిపిస్తోంది.