సినిమా ఆగిపోలేదని ఇలా క్లారిటీ ఇచ్చారు

స్టార్ హీరోయిన్ త‌మ‌న్నా.. అప్ క‌మింగ్ హీరో స‌త్య‌దేవ్ జంటగా ఇటీవ‌లే గుర్తుందా శీతాకాలం పేరుతో ఓ సినిమా మొద‌లైన సంగ‌తి తెలిసిందే. కన్నడలో విజ‌య‌వంత‌మైన ‘లవ్ మాక్‌టైల్’కు ఇది రీమేక్. ఈ సినిమా గురించి ఘ‌నంగా ప్ర‌క‌ట‌న చేశారు. ప్రారంభోత్స‌వం కూడా జ‌రిపారు. ఇక సినిమా సెట్స్ మీదికి వెళ్ల‌డ‌మే త‌రువాయి అనుకున్న ద‌శ‌లో త‌మ‌న్నా క‌రోనా బారిన ప‌డింది. వైర‌స్ నుంచి కోలుకున్నాక ఆమె ఈ సినిమా చిత్రీక‌ర‌ణ‌లోనే పాల్గొన‌డానికి సిద్ధ‌మైన‌ట్లు క‌నిపించింది.

కానీ ఇంత‌లో ఈ సినిమా ఆగిపోయిందంటూ కొన్ని రోజుల కింద‌ట వార్త‌లు హ‌ల్‌చ‌ల్ చేశాయి. బ‌డ్జెట్ స‌మ‌స్య‌ల వ‌ల్ల గుర్తుందా శీతాకాలం సినిమాను ఆపేయాల‌ని నిర్మాత‌లు నిర్ణ‌యించిన‌ట్లుగా చెప్పుకున్నారు.దీని మీద చిత్ర బృందం నుంచి అధికారికంగా ఖండ‌న ఏదీ లేక‌పోవ‌డంతో ఈ వార్త నిజ‌మేనేమో అన్న సందేహాలు క‌లిగాయి.

ఐతే ఎట్ట‌కేల‌కు చిత్ర బృందం ఈ వార్త‌ల‌పై స్పందించింది. సినిమా ఆగిపోయింద‌న్న ప్ర‌చారం గురించి ఏమీ మాట్లాడుకుండా.. ఒక అప్పీల్‌తో జ‌నాల ముందుకొచ్చింది. ఈ సినిమాలో స‌త్య‌దేవ్ చిన్న‌ప్ప‌టి పాత్ర చేయ‌డానికి 12-15 ఏళ్ల వ‌య‌సున్న కుర్రాడు కావాల‌న్న‌దే ఆ అప్పీల్‌. త‌ద్వారా ఈ సినిమా ఉంద‌ని, ముందు అనుకున్న కాస్ట్ అండ్ క్రూలో కూడా ఏ మార్పూ లేద‌ని చెప్ప‌క‌నే చెప్పింది.

త‌మ‌న్నా త‌ప్పుకోవ‌డం వ‌ల్లే సినిమా ఆగింద‌ని అన్నారు కానీ.. ఈ అప్పీల్ గురించి పోస్ట్ చేసిన పీఆర్వోలంద‌రూ స‌త్య‌దేవ్ స‌ర‌స‌న త‌మ‌న్నానే ఈ సినిమాలో న‌టించ‌బోతోంద‌ని పేర్కొన్నారు. మ‌రి త‌మ‌న్నాతో ఏ స‌మ‌స్యా లేదా లేక ఏదైనా ఉంటే ప‌రిష్క‌రించుకున్నారా అన్న‌ది తెలియ‌దు. ఇప్పుడిప్పుడే ఎదుగుతున్న స‌త్య‌దేవ్‌కు ఇలా సినిమా ఆగిపోయిందంటే నెగెటివ్ అవుతుంది. కాబ‌ట్టి అత‌డికి ఇబ్బంది లేద‌న్న‌మాటే.