లవర్ బ్రేకప్ చెప్పిందని.. 15కార్లు ధ్వంసం చేసి..

లవర్ బ్రేకప్ చెప్పిందని.. దేవదాసుల్లా మారిన వారిని చాలా మందినే చూసి ఉంటారు. లేదంటే.. మాజీ ప్రియురాలిపై పగ పెంచుకొని.. ఆమెను ఇబ్బంది పెట్టినవారు కూడా ఉండే ఉంటారు. ఇంకొందరు ఆ బాధ తట్టుకోలేక బలవన్మరణానికి కూడా పాల్పడ్డారు. అయితే.. ఓ వ్యక్తి మాత్రం చాలా విచిత్రంగా ప్రవర్తించాడు. తాను ప్రేమలో విఫలమైన బాధ తట్టుకోలేక.. తనకు ఎలాంటి సంబంధం లేని 15కారుల ధ్వసం చేశాడు. ఈ ఘటన కర్ణాటక రాజధాని బెంగళూరులో చోటుచేసుకుంది.

గురువారం రాత్రి వరకు బాగానే ఉన్న తమ కార్లు శుక్రవారం ఉదయం లేచేసరికి ధ్వంసమై కనిపించడంతో ఆ వాహనాల యజమానులు ఆందోళనకు గురయ్యారు. అనంతరం పోలీసులను ఆశ్రయించారు. కేసు నమోదు చేసుకున్న పోలీసులు దర్యాప్తు ప్రారంభించారు. దీనిలో భాగంగా సీసీ కెమెరా ఫుటేజ్‌ను పరిశీలించారు.

ఈ నేపథ్యంలో ఓ యువకుడు కార్లను రాడ్డుతో ధ్వంసం చేసినట్లు గుర్తించారు. అనంతరం నిందితుడిని గుర్తించి అదుపులోకి తీసుకొని ప్రశ్నించారు. ప్రియురాలితో బ్రేకప్‌ కారణంగా తీవ్ర కుంగుబాటు, మనస్తాపానికి గురై.. ఈ పనిచేసినట్లు సదరు యువకుడు విచారణలో పోలీసులకు తెలిపాడు. దీంతో పోలీసులు అతడికి కౌన్సెలింగ్‌ ఇస్తున్నారు.