పాలిమర్‌ కరెన్సీకి కేంద్రం రెడీ.. మరి పాత నోట్ల సంగతి..?

దేశంలో పాలిమర్‌ (ప్లాస్టిక్‌) కరెన్సీ నోట్ల ప్రయోగానికి కేంద్ర ప్రభుత్వం ఆమోదం తెలిపింది. తొలిదశలో రూ.10, రూ.20 విలువ కలిగిన పాలిమర్‌ నోట్లను ఫీల్డ్‌ ట్రయల్స్‌ కోసం ప్రవేశపెట్టేందుకు అనుమతించినట్లు కేంద్ర ప్రభుత్వం పార్లమెంట్‌కు వెల్లడించింది. ప్రయోగాలు విజయవంతమైతే ఒక్కో విలువకు సుమారు 100 కోట్ల (ఒక బిలియన్‌) నోట్లను ముద్రించే అవకాశం ఉంది.

పాలిమర్‌ నోట్ల తయారీకి అవసరమైన పాలిమర్‌ సబ్‌స్ట్రేట్‌ తయారీ, సరఫరా కోసం ఆర్బీఐకి చెందిన భారతీయ రిజర్వ్‌ బ్యాంక్‌ నోట్‌ ముద్రణ్‌ ప్రైవేట్‌ లిమిటెడ్‌ (బీఆర్‌బీఎన్‌ఎంపీఎల్‌) అంతర్జాతీయ స్థాయిలో ఎక్స్‌ప్రెషన్‌ ఆఫ్‌ ఇంట్రెస్ట్‌ (ఈఓఐ)ను ఆహ్వానించింది. జూలై 17న ఇందుకు సంబంధించిన ప్రక్రియ ప్రారంభించినట్లు ప్రభుత్వం తెలిపింది.

సాధారణ కాగితపు నోట్లతో పోలిస్తే పాలిమర్‌ నోట్లు ఎక్కువకాలం మన్నికగా ఉంటాయి. నీరు, తేమ, చిరిగిపోవడం వంటి సమస్యలను ఇవి తక్కువగా ఎదుర్కొంటాయి. తరచూ చేతులు మారే రూ.10, రూ.20 వంటి చిన్న విలువ నోట్లకు ఇది ప్రయోజనకరంగా ఉంటుందని భావిస్తున్నారు. అదేవిధంగా పాలిమర్‌ నోట్లలో అధునాతన భద్రతా లక్షణాలను పొందుపరిచే అవకాశం ఉండటంతో నకిలీ కరెన్సీ తయారీని అరికట్టడంలో ఇవి దోహదపడతాయని అధికారులు భావిస్తున్నారు.

పాలిమర్‌ నోట్లు అందుబాటులోకి వచ్చినప్పటికీ ప్రస్తుతం చలామణిలో ఉన్న కాగితపు కరెన్సీ నోట్లను వెంటనే రద్దు చేసే ఉద్దేశం లేదని ప్రభుత్వం స్పష్టం చేసింది. కొత్త పాలిమర్‌ నోట్లు కాగితపు నోట్లతోపాటు చలామణిలో ఉంటాయి. దశలవారీగా వాటి వినియోగం, ప్రభావాన్ని పరిశీలించిన అనంతరం తదుపరి నిర్ణయాలు తీసుకునే అవకాశం ఉంది.

దేశంలో డిజిటల్‌ చెల్లింపుల వినియోగం వేగంగా పెరుగుతున్న నేపథ్యంలో పాలిమర్‌ నోట్ల ప్రవేశం నగదు లావాదేవీలపై ఎలాంటి ప్రభావం చూపుతుందనే అంశాన్ని కూడా ఆర్బీఐ పరిశీలిస్తోంది. ఫీల్డ్‌ ట్రయల్స్‌ ద్వారా ప్రజల వినియోగం, నోట్ల మన్నిక, భద్రత తదితర అంశాలను అధ్యయనం చేయనున్నారు.