లెజెండరీ ప్లేయర్లను దాటేసిన హిట్ మ్యాన్

వడోదరలోని బీసీఏ స్టేడియంలో భారత్, న్యూజిలాండ్ మధ్య తొలి వన్డే పోరుకు సర్వం సిద్ధమైంది. గ్రౌండ్ లో టీమ్ ఇండియా అడుగుపెడుతుంటే ఫ్యాన్స్ కళ్లన్నీ ఇద్దరు దిగ్గజాల మీదనే ఉన్నాయి. వారే రోహిత్ శర్మ, విరాట్ కోహ్లీ. వీరిద్దరూ ఇప్పటికే టెస్టులు, టీ20 ఫార్మాట్లకు రిటైర్మెంట్ ప్రకటించి కేవలం వన్డేల్లో మాత్రమే దేశానికి ప్రాతినిధ్యం వహిస్తున్నారు.

ఈ మ్యాచ్ సందర్భంగా రోహిత్ శర్మ ఒక అరుదైన రికార్డ్ ని అధిగమించారు. టీమ్ ఇండియా తరఫున అత్యంత సుదీర్ఘ కాలం పాటు అంతర్జాతీయ క్రికెట్ ఆడిన ప్లేయర్ల జాబితాలో రోహిత్ ఇప్పుడు ఆరో స్థానానికి ఎగబాకారు. గత వారమే ఆయన దిగ్గజ స్పిన్నర్ అనిల్ కుంబ్లే రికార్డును వెనక్కి నెట్టి ఈ ఘనత సాధించడం విశేషం.

రోహిత్ శర్మ క్రికెట్ జర్నీ మొదలై ఇప్పటికి 18 ఏళ్ల 201 రోజులు పూర్తయింది. 24 ఏళ్ల పాటు ఆడిన సచిన్ టెండూల్కర్ ఈ జాబితాలో అగ్రస్థానంలో ఉండగా.. మొహిందర్ అమర్‌నాథ్, లాలా అమర్‌నాథ్ లాంటి దిగ్గజాలు తర్వాతి స్థానాల్లో ఉన్నారు. ఆశిష్ నెహ్రా, వెంకటరాఘవన్ లాంటి సీనియర్ల సరసన రోహిత్ ఇప్పుడు తన స్థానాన్ని సుస్థిరం చేసుకున్నారు.

అంతర్జాతీయ క్రికెట్‌లో అత్యంత సుదీర్ఘ కెరీర్ కలిగిన భారతీయ ఆటగాళ్ల లిస్ట్:

​సచిన్ టెండూల్కర్ (1989-2013): 24 ఏళ్ల 1 రోజు

​మొహిందర్ అమర్‌నాథ్ (1969-1989): 19 ఏళ్ల 310 రోజులు

​లాలా అమర్‌నాథ్ (1933-1952): 19 ఏళ్ల 0 రోజులు

​ఆశిష్ నెహ్రా (1999-2017): 18 ఏళ్ల 250 రోజులు

​ఎస్.వెంకటరాఘవన్ (1965-1983): 18 ఏళ్ల 214 రోజులు

​రోహిత్ శర్మ (2007-2026): 18 ఏళ్ల 201 రోజులు

​అనిల్ కుంబ్లే (1990-2008): 18 ఏళ్ల 191 రోజులు

​దినేష్ కార్తీక్ (2004-2022): 18 ఏళ్ల 58 రోజులు

ఇతర ఫార్మాట్ల నుంచి తప్పుకోవడంతో రోహిత్ తన ఫోకస్ అంతా వన్డేల మీదనే పెట్టారు. తన ఫిట్నెస్ ని కాపాడుకుంటూ జట్టుకు అవసరమైన హిట్టింగ్ అందించడమే లక్ష్యంగా పెట్టుకున్నారు. 2007లో ఒక సాధారణ యువకుడిగా కెరీర్ స్టార్ట్ చేసిన రోహిత్.. ఇప్పుడు ఒక ఐకాన్ గా ఎదిగారు.

దినేష్ కార్తీక్ లాంటి సీనియర్లను సైతం వెనక్కి నెట్టి టాప్ 6 లోకి రావడం అతని నిలకడకు నిదర్శనం. పద్దెనిమిది ఏళ్లకు పైగా హై లెవల్ క్రికెట్ ఆడటం అనేది మామూలు విషయం కాదు. ఎన్నో గాయాలు, ఒడిదుడుకులను తట్టుకుని నిలబడటం వల్లే ఇది సాధ్యమైంది. మరి న్యూజిలాండ్ తో జరగబోయే ఈ సిరీస్ లో హిట్ మ్యాన్ తన రికార్డుల జోరును ఎలా కొనసాగిస్తారో చూడాలి.