HIVని జయించిన మొదటి వ్యక్తి ఇతనే

ఈరోజు డిసెంబర్ 1, వరల్డ్ ఎయిడ్స్ డే. సాధారణంగా “హెచ్‌ఐవీ (HIV) వస్తే జీవితం అయిపోయినట్లే, దానికి మందు లేదు” అని చాలామంది బలంగా నమ్ముతారు. కానీ, వైద్య చరిత్రలోనే ఒక అద్భుతం జరిగిందని, ఒక వ్యక్తి హెచ్‌ఐవీని పూర్తిగా జయించాడని మీకు తెలుసా? అతని పేరే తిమోతి రే బ్రౌన్. ప్రపంచం అతన్ని “ది బెర్లిన్ పేషెంట్” అని పిలుస్తుంది.

తిమోతి కథ ఒక మెడికల్ మిరాకిల్. 1995లో అతనికి హెచ్‌ఐవీ సోకింది. మందులు వాడుతూ బతుకుతుండగా, 2006లో అతనికి మరో దెబ్బ తగిలింది. లుకేమియా అనే బ్లడ్ క్యాన్సర్ వచ్చింది. క్యాన్సర్ చికిత్స కోసం అతనికి ‘స్టెమ్ సెల్ ట్రాన్స్‌ప్లాంట్’ చేయాల్సి వచ్చింది. ఇక్కడే డాక్టర్లు ఒక వినూత్న ప్రయోగం చేశారు. హెచ్‌ఐవీని అడ్డుకునే అరుదైన జన్యువు ఉన్న వ్యక్తి నుంచి స్టెమ్ సెల్స్ తీసుకుని తిమోతికి ఎక్కించారు.

ఆపరేషన్ సక్సెస్ అయ్యింది. కానీ అసలు షాక్ తర్వాత తెలిసింది. తిమోతి శరీరం నుంచి క్యాన్సర్ మాత్రమే కాదు, హెచ్‌ఐవీ వైరస్ కూడా పూర్తిగా మాయమైపోయింది. అతను రెగ్యులర్‌గా వాడే మందులు మానేసినా వైరస్ మళ్లీ రాలేదు. 2008లో ఈ విషయం ప్రపంచానికి తెలియగానే మెడికల్ సైన్స్ ఆశ్చర్యపోయింది. “హెచ్‌ఐవీని నయం చేయడం సాధ్యమే” అని తిమోతి నిరూపించాడు.

దురదృష్టవశాత్తూ, తిమోతి రే బ్రౌన్ 2020లో ఆయన కన్నుమూశారు. కానీ అతను చనిపోయింది ఎయిడ్స్ వల్ల కాదు. అంతకుముందు ఉన్న బ్లడ్ క్యాన్సర్ లుకేమియా మళ్లీ రావడంతో చనిపోయారు. చనిపోయేంత వరకు ఆయన శరీరంలో హెచ్‌ఐవీ వైరస్ జాడ లేదు. అంటే ఆయన ఎయిడ్స్‌ను పూర్తిగా జయించి, చరిత్రలో నిలిచిపోయారు. తిమోతికి చేసిన చికిత్స అందరికీ సాధ్యం కాకపోవచ్చు, అది చాలా ఖరీదైనది, రిస్క్‌తో కూడుకున్నది కూడా. కానీ, అతను ఇచ్చిన స్ఫూర్తితో శాస్త్రవేత్తలు కొత్త దారుల్లో పరిశోధనలు చేస్తున్నారు.